美國候任總統特朗普嘅富商女婿庫什納（Jared Kushner）最近成為政圈大紅人，事關佢即將出任總統高級顧問，不過呢位高富帥已經被私有化，而佢細佬約書亞（Joshua Kushner）亦都封咗盤。
約書亞最為人熟悉嘅身份係超模KK（Karlie Kloss）男朋友，今年31歲嘅約書亞已經同24歲嘅KK拍施四年，成日拍拖放狗。
約書亞畢業於哈佛商學院，佢話自己讀書時，已經四圍飛，例如今日飛去巴西或阿根廷傾生意，之後星期四趕返學校上堂咁。
佢主要從事投資業務，係Instagram其中一位最早投資者，又同哥哥一齊創立Cadre——一家注重科技嘅房地產投資公司，五年前仲創立醫保公司Oscar Health，好多瓣數。
有趣嘅係，約書亞原來係堅定嘅民主黨支持者，美國大選前，佢已經表明唔會支持代表共和黨出戰總統嘅特朗普，高富帥就是任性。
