› 選擇地區
三藩市
紐約
洛杉磯
其他美國地區
香港 台灣 北美
 
2017年01月17日

智取大市:中美關係會變好? - 晉佳

特朗普始終係生意佬出身,商場無永遠敵人。 資料圖片

莫講話散戶,睇得出大戶都係灰灰哋,大家年初博反彈,冇幾多錢賺就要諗散水,行為已證明一切。究竟大戶係咪諗得太灰?如果要小弟數一項大戶可能諗得太悲觀嘅因素,小弟會估中美關係。
睇到呢度,大家可能掟雞蛋大嗌回水:「玩嘢呀!特朗普威脅唔恪守一中政策,中美關係有乜可能唔衰?」
特朗普連櫈都未坐上去,就已經出言挑戰中國,所以大家估,上任後特朗普變本加厲,中美打交都似,邏輯推理上絕對冇錯,合乎常理,而中資股已經或正在反映呢項負面因素。不過,換句話說,只要有新證據證明中美關係不如預期差,都會轉化成為股市有利因素。

呢一刻有兩件事等大家思考吓,第一,係內地走資。如果回帶睇返兩年前,中國同美國之間嘅金融實力,未至於相差太遠,但內地走資問題已經持續超過一年,庫房劇減係金融實力削弱嘅表徵,更重要嘅係,連強國人自己友都要走走走走走,反映所謂市場價格之下,強國人對於美金嘅信心程度,遠高於人仔,呢個先係中美金融實力真正差距。特朗普上場證明美國佬已經唔怕中國人,中國眼見形勢比人弱,未必會好似過往幾年張牙舞爪,兩者火花有可能比預期少,花生指數大跌,可能對市場有利。
第二件事,特朗普同馬雲做咗friend。特朗普始終係生意佬出身,商場無永遠敵人,佢一方面以「放棄恪守一中政策」呢類口水戰嚟爭取美國fans,另一方面都期望喺中國身上搵到經濟上嘅着數,侵侵開口埋口馬雲似乎證明呢一點。有錢佬就係咁,有時會一邊同你嗌交、一邊同你做生意,有利益關係嗰啲就係朋友。
一句講晒,情況未必差到盡頭,當今年港股跌過龍、不利因素盡反映之際,總有利好因素近在咫尺,提供反彈嘅充份理由,係咪中美關係?可先備忘等待時間驗證。

晉佳
http://fb.com/advanceguy1

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載