蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月18日
馬上成為壹會員

收市閒情:林鄭「故宮式」玩fb - 千頌C

林鄭唔玩fb,又唔想失去網上嘅影響力,真係矛盾。 資料圖片

一個人處事手法係點,由佢點玩facebook(fb)多多少少都有迹可尋。幾日貼一次新手袋相,加句:「今天要獎勵自己」,港女格表露無遺;「他不是男朋友,但比男朋友更親更重要」,仲唔係專業觀音?
That's why老闆們請人前會先scan吓求職者fb;而又that's why大家都認為玩fb玩到出神入化嘅財爺,夠貼地兼民望高!林鄭月娥日前嘅參選宣言,強調公眾參與、強調社會共識、強調適切回應……好似好堅咁,咁不如睇佢點玩fb。
Oh,Sorry!林鄭是沒有官方fb的,不過佢唔係冇玩㗎!林鄭個「網絡戰戰術」,四個字:隔山打牛!你去劉鳴煒fb,見到佢星期六po咗幾張奶媽去「親善探訪」嘅相(留意番,盛傳Package Lau將出任林鄭競選辦副主任);競選辦主任陳智思星期日又幫奶媽po行山相。咁樣「隔山打牛」嘅政客應該係香港獨有!消息人士就話,林鄭公關團隊策略係,自己唔開fb,但就發相畀朋友po,然後私下通知友好媒體發放消息,話咁樣易控制輿論。噚日我打過去競選辦,問佢哋幾時開fb,佢哋都係話:「總之暫時就未有啦。」林鄭處理社交網絡嘅手法,最簡單講,其實佢咁玩fb,即係等如「假溝通、假諮詢」。

之前拍板起香港故宮,然後事後再開放公眾諮詢,擺出一副「起我就起硬,最多呢幾part仔留畀你班友話事啦」嘅態度,然後大大聲聲話「我做咗諮詢啦」。
今日搵自己友po親民相,網民連直接畀like畀嬲呀奶媽都冇機會,難道咁就當同網民溝通過?今日因怕「嬲」,怕見到唔想見到嘅留言,就索性唔開fb;他日當選後,遇到任何好可能惹來批評嘅政策,係咪因怕咗反對聲音,就索性「故宮式」做法,唔諮詢就拍板?
想當年梁振英要選特首,都扮晒嘢聽民意。今日林太強調公眾參與、強調社會共識、強調適切回應……講咁多嘢,不如開番個fb,融入網上500萬港人用戶嘅世界先啦。

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載