› 選擇地區
三藩市
紐約
洛杉磯
其他美國地區
香港 台灣 北美
 
2017年01月19日

操盤手札記:
揀特首選戰概念股 - 割柑人

揀本地電訊股,要揀寬頻業務比重較大嘅,如香港寬頻。 資料圖片

美國候任總統特朗普周五就職前,不斷辣起火頭,日前就抨擊歐盟同北約。不過,佢抨擊美元過強,引發美元拆倉,外幣大反彈,資金大挪移,則令港股受惠。恒指一舉突破23000關,收23098,升257點,重上100天線。
美國白宮易主,歐洲今年亦選戰連場,本港有特首選舉。「奶媽」林鄭月娥話參選係上帝旨意,玩君權神授?咪以為佢太平天國洪秀全上身,可能係深諳國情啫!早前央視節目《人類,我們的故事》,播出一集耶穌專題,相當正面咁評價耶穌嘅影響。奶媽悟性咁高,食住上唔出奇。
目前奶媽聲勢最大,據講西九董事局副主席夏佳理係佢競選辦主席。夏佳理係信和置業(083)、恒隆地產(101)及香港興業(480)嘅非執行董事。另外,華人置業(127)主席劉鳴煒傳會擔任佢競選辦副主任;麗新發展(488)主席林建岳嘅個人助理陸瀚民亦係成員。

姑勿論奶媽係咪你杯茶,上述概念股都不妨留意。若你唔like佢到連做心理對沖都費事,則可留意佢老細敵視嘅王維基創辦嘅香港電視(1137)及香港寬頻(1310),雖然前者上月爆升後已打回原形,後者則早已賣盤。兩者比較,後者秤先啲。
繼香港電訊(6823)業績好過預期,獲瑞信、德銀調高評級後;數碼通(315)又獲美銀美林上調評級,本地電訊股似乎掀起重新評估潮。睇預測息率,香港電訊、數碼通、香港寬頻分別為6.14厘、5.31厘、4.75厘,比房託、收租股嘅3至4厘吸引。不過,揀股要睇基本因素。
香港電訊業績顯示,本地數據服務收益錄得增長,流動通訊收益則倒退,換言之,揀本地電訊股,要揀寬頻業務比重較大嘅,例如香港電訊及香港寬頻。由於香港寬頻唔再以低價搶佔市佔率,可睇高一線。該股現價9.06元,走勢圖呈現區域突破利好訊號。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載