› 選擇地區
三藩市
紐約
洛杉磯
其他美國地區
香港 台灣 北美
 
2017年01月20日

太古廣場:仲去日本掃平藥妝?
直接送到屋企仲好啦! - 關家姐

超立體口罩喺Amazon買,仲要平過日本藥妝店。

想趁yen再上之前平買藥妝?唔使搶平機票去日本入貨嘅傻豬,呢個世界有Amazon㗎嘛,仲有直送香港㖭!價錢分分鐘仲平過喺日本藥妝店呀、驚安之殿堂買㖭呀,跟家姐嚟網上爆買啦!
最近毒霧咁嚴重,梗係要大手入口罩啦。有隻日本好出名嘅口罩,一嚟佢產品名叫「超立體」,戴咗真係唔會頂住口鼻;二嚟佢勾住耳仔條繩係紗布料,又舒服又貼面,家姐我次次都俾人託買勁多,搞到要爆買。呢款口罩七片裝喺藥妝店賣380yen已經覺得好平,Amazon竟然仲只係賣268yen,即係每個口罩都係兩個幾港紙咋!可以大手入貨抗毒霧啦!

另外港女最鍾意托返嚟嘅平面膜都有,阿信屋旗下Kawaiiland都有賣嘅日本Pure Smile面膜,香港一塊賣幾蚊,日本藥妝店有8片裝,Amazon只係賣436yen,除返開每塊都係3個幾港紙咋陰功!一大盒有42塊嘅Lululun Mask都有得賣,仲要同藥妝店免稅個價錢一樣,只係1,500yen!同價之餘最重要係唔使托,42片裝喎,買多幾盒都拎唔到返酒店啦!
喺屋企就買到日本藥妝係好high,咁但係運費呢?自從日本Amazon上年開始直送香港之後,運費真係平到笑。當我買三磚Lululun面膜(真係成嚿磚咁)、三包口罩,同埋頭先講嘅Pure Smile面膜,仲有啲洗面乳補充裝咁,埋單運費都只係80幾蚊港紙,就有速遞送到門口。會唔會好耐先?我唔直接答你,我用例子答你:家姐我喺日本Amazon買過兩次嘢,星期三落單,星期六就收到速遞電話到咗門口!仲快過喺日本買完去郵政局寄返香港呀!(除非你寄超貴EMS啦吓)

會唔會驚上網賣嘅係假嘢?放心,Amazon唔係強國嘅產物,你會見到產品賣家其實就係官方,例如喺Amazon賣雪肌精嘅會係Kose,由官方供返貨畀Amazon,分分鐘仲信得過你喺啲不知名又好平嘅藥妝店買呀。
唔止女人嘢,日本Amazon買DVD甚至blu-ray都係平到笑,兩者仲要多數同價。之前諗住買返隻《Interstellar》嚟儲,隻blu-ray都只係1,080yen,即係70幾蚊港紙咋!當然係無中文字幕嘅,但都仲有英文同日文揀,英文唔好可以考慮番喺香港用幾百蚊買。

最後,都有啲嘢係Amazon買唔到嘅,因為暫時可以寄嚟香港嘅貨好有限,嚟緊會唔會增加就唔知喇。首先大部份藥品類都唔寄得,龍角散呀、咳丸傷風丸一律NO;另外有啲大牌子例如雪肌精同埋Sofina都係唔賣海外的,梗係啦平咁多,你叫香港門巿仲使做嘅?所以要買呢啲,就要飛一轉日本喇。

【家姐教路】
係,日本Amazon係用日文嘅,但其實買嘢都係睇嗰幾樣:產品名、價錢、數量㗎啫。喺Google搵返件產品嘅日文名,再copy & paste落Amazon search bar就可以搵到。最最最緊要係search完要搵左手邊一個叫「絞り込み」嘅物體,其實即係narrow search,㩒呢個再揀海外配送(Amazon Global),就會show晒邊啲貨送香港。唔識咪搵個識日文嘅朋友幫手囉,仲易過搵人幫你托貨返香港啦。

提供上面講過嘅產品日本名畀大家search:
超立體口罩:ユニ・チャーム超立体マスク
Pure Smile面膜:ピュアスマイル エッセンスマスク
Lululun面膜:フェイスマスク ルルルン

關家姐
http://fb.com/kwangajei
本欄逢周五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載