› 選擇地區
三藩市
紐約
洛杉磯
其他美國地區
香港 台灣 北美
 
2017年01月25日

Money Walker:
市場已習慣全球化亂局 - El.

反全球化聲音越見壯大,特朗普更借此入主白宮。 資料圖片

反全球化聲音近幾年越見壯大,特朗普更借此旗幟成功入主白宮。
筆者近期見到一個講法,指市場經濟雖不完美,但持續改行共產制嘅國家至今寥寥可數,原因係市場經濟係現存經濟制度中最佳選擇,所以各國唔會單純因資本主義存在問題就將之全盤推翻,而係會思考如何扶助同保護市場經濟下弱勢一群。例如綜援制度同以往本港租金管制,就係彌補市場經濟不足嘅措施。
既然市場經濟可借此途存活至今,理應亦有補救措施去幫助全球化與自由貿易下嘅受害者,全球化之路不必完全逆轉。不過筆者覺得,指望侵侵搵出全球化平衡點係天荒夜譚,而且相關補救措施或意味美國政府需要提供更多補貼,並對企業實施更多監管,呢啲都未必係金融市場所樂見。

講番投資,全球化係緊扣去年同今年歐美政治風險嘅主線,但唔少機構投資者都話唔太放特朗普上台同歐洲大選呢啲風險喺眼內,因為已習以為常,表明唔會因此暫停投資動作,仲話投資者唔應該太着重無路可捉嘅政治因素,而係要集中留意番股份基本因素,並諗辦法控制投資組合嘅風險水平,咁先係應付三幾個月就出現一次政治黑天鵝嘅上策。
話雖如此,筆者覺得侵侵對人民幣同中國貿易嘅取態,其實會直接牽連到香港經濟同股市投資氣氛,所以呢個議題仍要密切關注。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載