› 選擇地區
三藩市
紐約
洛杉磯
其他美國地區
香港 台灣 北美
 
2017年02月07日

大棋局:特朗普「嘴炮」真定假 - Mr. Tregunter

特朗普上任兩個星期簽署咗22項總統令。 資料圖片

特朗普自上任以來三日唔埋就四處發炮,有人話佢係黐線佬,有人話佢係狂人,有人話佢係第二個列根。究竟佢係齋講定真做,不妨先睇一組數據。據外媒統計,特朗普上任兩個星期簽署咗22項總統令,其中包括8項行政令(Executive orders)、12項總統備忘錄(Presidential memoranda)、2項總統宣言(Proclamations)。
上述三種總統令,行政令最具影響力。因為行政令需要經聯邦注冊局編號,再刊登喺聯邦公報,而且要註明屬憲法範圍定法律範圍。總統備忘錄唔需要編號,唔會刊登喺聯邦公報,換句話即唔需要對外公佈。若備忘錄指令所需資金唔超過1億美元,亦唔需要註明。而總統宣言則多屬呼籲。

簡單嚟講,總統令有點類似中國以前南書房、軍機處內下達嘅指令,目的係繞過內閣(國會),直接下令。所以衡量美國總統任內有冇過份行使權力,就係睇上述數字。華盛頓任內簽署咗8項行政命令,列根381項,克林頓364項,奧巴馬277項。羅斯福最誇張,簽咗3,721項,但當時正值大蕭條及二戰,加上佢連任三屆總統。
特朗普向四方發炮用意何在,以中國人傾生意角度視之或見端倪。中國人傾生意要夜夜笙歌,不醉無歸。除咗可順便出公數去玩外,好多時係一種觀察。孟子有句話:「好名之人能讓千乘之國,苟非其人簞食豆羹見於色。」意思係一個人為咗名聲可以天下都唔要,但就為一碗湯露出吝嗇嘅神情。
埋枱傾嘢個個都話自己掂過碌蔗,傾深入啲先知虛實。飲到懵下懵下,磨爛蓆越耐,越容易睇穿對方有幾多料同底線喺邊。特朗普嘴炮有真有假,但較多嘅可能只係睇對方反應?拎佢嘅嘴炮同簽署嘅總統令拍埋對比,會知道乜嘢需要畀反應,乜嘢唔需要。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載