› 選擇地區
三藩市
紐約
洛杉磯
其他美國地區
香港 台灣 北美
 
2017年02月07日

中環在線:
爆seed石禮謙送「吻」歐達禮 - 李華華

石禮謙(圖左)噚日向歐達禮(圖右)開火,痛批上市架構改革。

噚日經民聯議員石禮謙好好火,鬧爆證監會想靠改革奪權,鬧到興起,佢竟然想錫啖證監會行政總裁歐達禮㖭呀,不過係死亡之吻!
話說噚日立法會財經事務委員會開會,證監會高層主要報告今個財政年度預算,石禮謙先禮後兵,率先話自己支持呢份預算,但話鋒一轉,就開始solo表演,由頭帶到落尾,鬧爆證監會舊年推出嘅上市架構改革,指市場人士好擔心證監會以理順審批新股上市流程為名,實際上係透過改革,奪取大部份權力,架空港交所(388)云云。

狂數舊論點

其實,石議員所講嘅一堆論點,上個暑假一早被人講晒,佢上個暑假都有陪過金融服務界議員、黨友張華峰派傳單嘅,不過就好少見佢出聲,整個上市改革諮詢,主要由大孖沙力撐嘅上市公司商會,做反對派大旗手。立法會選舉完結之後,經民聯牽頭搞咗場論壇,石禮謙都有份出席咁囉。
唔知點解石禮謙噚日忽然就呢個議題開行turbo,同場嘅梁繼昌稍為搭嘴,話市場監管應該更嚴謹,石禮謙就食住個勢問證監會歐達禮:「嗱,敵人同朋友畀你嘅死亡之吻,你自己揀要邊啖啦,反正你有兩邊面珠可以錫。」全場聽到O晒嘴。
石禮謙係代表地產及建造界,無端端咁勇,唔通早前佢去拜年時,各方好友叫佢喺立法會講多兩句?

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載