› 選擇地區
三藩市
紐約
洛杉磯
其他美國地區
香港 台灣 北美
 
2017年02月08日

財經評論:759老闆經營哲學

阿信屋的老闆林偉駿話唔係自己「太多心」,只是當時錯估形勢「行得快咗」。 資料圖片

經營阿信屋的CEC國際(759)主席林偉駿接受訪問,話唔係自己「太多心」,只是當時錯估形勢「行得快咗、開頭太順利」。的確阿信屋的一台戲獲得許多港人讚好,也令我被友人罵足幾年,為何?只因曾幾何時阿信屋代表對抗地產、超市霸權,不看好的人猶如與民為敵。
但阿信屋由幾間舖仔變幾百間分店的都市傳奇,早在幾年前已然變色。事關公司無章法地由賣零食,跨足到老人產品、麵包、化妝品、雲吞麵等等都開上。記得當年阿信屋的聲勢浩大,傳媒都對其趨之若鶩。當時我亦有到阿信屋走了一趟,問到林偉駿為何開麵檔?他指單純覺得對方的麵好食,執笠可惜,便招攬開新麵檔,仲話新店魚蛋、貢丸等用番阿信屋嘅貨。

此事亦為阿信屋再賺得小店救星的名號,朋友都話,升斗市民最緊要係「我唔想畀錢百x、惠x賺」。問林生如何決定做邊瓣?林生竟笑笑口話打開報紙邊間執笠做邊間,真㗎,冇得諗咁多。再問多幾句,林生就封口指,總之我一股都冇沽,唔係炒股的人。呢幾句聽落好霸氣,但實際聽得我一額汗。做生意要計數,阿信屋的零售生意利潤好奀,在香港做生意唔易,租貴、人工貴,成本貴,要幫補一籮未上軌道,甚至完全無協同效益、無規模效應的新業務,只是百上加斤,難道阿信屋隻隻手都能點石成金?同埋你說不在乎股價?上得市,誰信?
最終該次訪問無出到街,但事隔兩年多,阿信屋終於講整合業務,但依然無方向,就好似話要將759 Kawaii分店結束改裝,轉頭又話唔執晒……到底點?我又唔係林生心裏條蟲,鬼知咩。

記者:方楚茵

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載