› 選擇地區
三藩市
紐約
洛杉磯
其他美國地區
香港 台灣 北美
 
2017年02月15日

收市閒情:
情人節搵譚仔阿姐 - 千頌C

如果去譚仔慶祝情人節,不知會唔會分手收場。 資料圖片

情人節,又係我阿James出動嘅日子。「James,點呀你有冇着落呀。」Stanley問得咁有自信,明顯佢有拖拍啦。「冇呀,你呢,book咗枱未?」「邊使Book㗎,是但食啦。」
Stanley一向言出必行,佢話是但,真係可以好是但,咁我就提議,「不如食翠華(1314),一三一四好意頭。上網睇佢仲有個情人節餐,138蚊!抵呀!」我哋係金融佬,吓吓都number行先,點知俾人當頭捧喝:「食食食,食懵你呀。138蚊係per head呀,兩個人埋單近300食翠華,係咪short咗!講一生一世?你唔記得咗隻1314之前仲想賣盤咩?最慘係咩呀,賣唔出之後跌到瞓喺度呀!走投無路之後,個太子爺行出來同你講,『香港是我家』,肉酸到……股票已經俾佢鋸,情人節仲畀佢鋸?咪搞我。」

「咁食Ikea囉,168蚊兩位情人節set,喺正東九龍核心地段,盡享北歐風味,食飽後仲有大量梳化休息,抵到爛!」「阿哥,你見唔見,限售100個set;最重要係,毒果報咗啦,邊有可能食到呀?」「大哥,你呢樣又唔得,嗰樣又唔得,煩過女人呀,食譚仔算啦!」估唔到我一句晦氣話,佢又buy喎,「係喎!冇理由譚仔呢間絕對有potential上市嘅餐廳,冇得食情人節餐嘅!」
說時遲,那時快,Stanley竟然拎起電話,開埋speaker。「係咪譚仔呀?想問有冇情人節套餐呀?」Stanley誠懇地問。「你可以叫個套餐,都係二人小食。」「會唔會加價呀?」「唔會呀,同平時一樣價錢。」「我想同女朋友來,有冇咩推介?」「食唔食得辣呀?」估你唔到係,阿姐真心獻計,「食啲茄湯呀,酸酸地甜甜地,情人節梗係sweet sweet。再唔係叫啲皮蛋啦!」聽到皮蛋呢兩個字,連Stanley都忍唔住問「皮蛋又關事?」「皮蛋整好之後,好似朵花咁架嘛!」
最後,Stanley俾譚仔個套餐、朵花同埋個咁過癮嘅阿姐吸引咗,決定同女朋友去譚仔慶祝。而我唔知,佢嘅決定會唔會令佢分手收場。

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載