› 選擇地區
三藩市
紐約
洛杉磯
其他美國地區
香港 台灣 北美
 
2017年02月15日

【把妹失敗語錄】林作鍾意做兵
渾水:追女年使十萬

大狀林作、財演渾水,兩個後生仔;兩個都係唔梳頭;偏偏一個身邊美女如雲,一個日日為追女頭痕。

雖然呢兩位男士都未過三十,但喺感情路上,亦都曾經滄海。「我上年追女經費十萬。」渾水假假地都係財演,又假假地都係個執董,但佢感情世界空白一片,係圈內人所共知嘅事實。當然,十萬蚊一年,一個月一萬蚊都冇,你話天價又唔係,但最大問題係,「追女經費十萬…但都追唔到」。

佢話,過去一年呢十萬蚊,用來追幾個女仔,「我請女仔食飯,多數食貴嘢,我追名牌鍾意食米芝蓮星級餐廳。」不過,幾多粒星都冇意思,因為最後只有一次成功,而且拍拖時間係以星期計。簡單來講,十萬蚊,就係變成當兵經費,或者更準確來講,係水魚經費。

講到做兵,「我鍾意做兵」呢句說話,由林作把口講,相信會令男士們不滿,佢解釋,因為做兵冇壓力,概念上類似「原來沒有,從來都沒有」。語出驚人嘅林作,更加話如果心儀嘅女生有男朋友就更加好,「可以畀個女仔一個對比,(當佢覺得)出面嗰個好似好啲,咁我咪有橋啦,追佢時間仲快過佢冇男朋友。」

用財經術語講,追到女仔即係「私有化」,而「私有化」只係第一步,更重要嘅係「維穩」,即係維繫感情穩定。林作喺呢方面,都有佢嘅辦法,「有時Cut咗線講完電話之後,我會兩分鐘後打返畀佢同佢講,『兩分鐘對我來講,等如兩個鐘』……永遠都將對方讚到天上有地下無,『你今日係我見過呢幾年嚟,最靚嘅一日。』」

各位男士昨日豪洗「維穩費」嘅時候,喺度都要真心奉勸各位,搞搞個頭先!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載