› 選擇地區
三藩市
紐約
洛杉磯
其他美國地區
香港 台灣 北美
 
2017年03月10日

財金冒險號:兩類人仍可買樓 - 笑笑生

去年初靠一句「專家食屎」成為網紅嘅天水圍嘉湖業主林太話:「自住唔怕接火棒。」

樓價破頂,有專家高調轉軚睇升兩成,有淡友繼續睇淡,但指已進入牛市三期,出現恐慌性買入。可見無論好友淡友,都至少短期內睇升。如果股市出現咁一面倒嘅睇法,好可能見頂,但樓市趨勢一般長好多,因為流通性低,買賣成本高,唔似股市咁炒上炒落。
小生都估未來幾個月會不斷創出癲價,尤其係最隔涉嘅上水、深井、屯門碼頭之類,癲到大家麻木,樓價至會回落。𠵱家投資一定唔買樓,但如果自住,有兩類人不妨一齊癲價搶。

一)可以一炮過買嘅人。1997至2003年樓價跌七成,點解有人燒炭?因為畢生積蓄化為烏有,甚至淪為負資產,一時睇唔開。如果唔借按揭,就可以笑看樓價升跌,就算急插三成,人地變成負資產,你仲係賬面輸緊面嗰浸,又唔怕樓災拖跨經濟,連份工都無埋,因為你唔使供樓。如果筆錢係「靠父幹」,就更加唔使猶疑!俯首甘為孺子牛,豈會介意樓價跌。
二)夠錢買dream house嘅人。傳統智慧話:後生仔買樓,唔好嫌細嫌舊嫌遠嫌無會所,最緊要上咗車先,慢慢細屋搬大屋。啱!但前提係樓價唔跌,萬一跌咗,賣咗樓都唔夠畀首期換樓。靠一句「專家食屎」成為網紅嘅天水圍師奶話:自住唔怕接火棒。又啱!但前題係打算住喺度十幾廿年。若強求上車而屈就喺山旮旯納米樓,怕且有排都換唔到樓。

笑笑生
http://fb.com/sneeringman

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載