蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月27日
馬上成為壹會員

財經評論:港鐵新優惠真係抵?

都會票是以「拍卡入閘,插卡出閘」的方式使用。 資料圖片

港鐵(066)票價調整機制本月完成,雖然一如主席馬時亨所講:「無咩驚天動地改變」,決定保留每年計算票價調整幅度的方程式,但總算「有啲甜頭」,市民使用八達通每程車費可有3%回贈,即「打九七折」,取代現時「即日第二程九折優惠」,港鐵料每日受惠市民會由現時170萬人,增至每日470萬人,今年六月生效。
事實上,「九七折」又有幾優惠呢?如沿用舊制(第二程九折),假設由荃灣往返中環,來回須付$14.2+$14.2 X 9折 = $26.98,即每程為$13.49;如果用新制(八達通九七折),假設票價不變,即$14.2 X 97折,每程要$13.774,即變相加價2%,再講如果每次過海用「都會票」,總票價425元,40程除開即每程為$10.625;邊樣最抵,相信一目了然。

上述情況可見,都會票以大幅度拋離八達通優惠,港鐵同日公佈將延長推出近三年的都會票期限,由30天延長至40天。不過,適逢於機制公佈前,有朋友因工作關係,要經常來回港島見客,而購買港鐵都會票,卻遇上不愉快經驗,不吐不快。
先說都會票玩法,據現有制度,用戶可於30日內搭40程,票價425港元,覆蓋七條主要路綫,即荃灣綫、觀塘綫、港島綫、南港島綫、將軍澳綫、東涌綫及西鐵綫。其實要30日內用40程,如對居住新界,要過海上班的打工仔來講,一星期五天工作,每日來回的話一個月理應用盡。
不過,都會票是以「拍卡入閘,插卡出閘」的方式,朋友告知,一來不方便,先要將八達通、都會票及其他接觸式卡類分開放置,二來朋友未必每日過海見客,有時只從新界辦公室到九龍,因此又要再計究竟都會票較平,還是「第二程九折」更抵。

朋友自問「大頭蝦」,頭幾次不慣用都會票,會錯拍八達通過海,自己衰,無得怪。但最令他不快的是,曾試過一拍,屏幕顯示「都會票失效」,要他到老遠的客戶服務中心,頭一次趕時間,於是用八達通代替;第二次入閘,再來「都會票失效」,心有不甘,於是到客戶服務中心查詢,豈料職員得一個,卻要服務兩邊市民(站內及站外),搞到大排長龍,不了,又無用都會票,用翻八達通過海。結果因機件問題,上述情況發生不下五、六次,而距離30日的期限只剩幾天,但朋友的都會票尚餘下廿程未用,看來要蝕畀港鐵。
無可否認,港鐵載客量眾多,所以無論加到幾盡,市民都迫於無奈乘搭,否則有日停駛,特別對要過海上班的市民應該大為不便。都會票延長多十天固然是好事,有優惠好過無優惠,但要真正回饋市民,何不由減少故障、增加人手及改善系統等問題做起,或直接減票價,何需以折扣取巧?

記者:范穎琛

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載