蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月29日
馬上成為壹會員

收市閒情:
港樓「穿窿」有秘密 - 千頌C

凱旋門採用中空設計。 資料圖片

生活喺香港,係反智嘅,你話有選舉咩?係假嘅!你話樓價貴咩?咪又係咁多人買。不過所有反智現象,都係背後有利益集團操控,就算係講緊一幢樓,好地地點解穿窿?咪又係錢作怪。
最近睇外國網站,唔知邊度搵到個神級專家,話香港唔少豪宅有中空設計係風水問題,話可以畀龍穿過。喂!好笑喎!做咗香港人咁多年,都冇諗過地產商咁為業主運程着想。Sorry,呢位「專家」FF太多,香港人冇咁好命,個窿最大作用係cap水。

唔係話個窿係為通風咩?去到呢啲咁高深嘅問題,梗係問香港地產界核心要員。
「儍豬嚟嘅,通風完全唔係發展商concern,所以唔會為通風做任何嘢!問題係政府限地積比率,咁高層面積多啲,可以賣貴好多,佢開個窿,就可以晾高成座大廈!」
「咁個窿咪可以無限大?」
「咁又唔得,樓面有限制之餘,高度都有限制,更重要係,個窿越大,建築成本又貴啲,你諗下,風明明喺兩邊過,但有大窿就搞到成條數唔同晒,所以凱旋門個窿算好誇張!」
「講到低層咁唔值錢,咁隔火層應該都幫到手晾高層樓?」

「Exact_ly!理論上40層以下係唔使隔火層,如果層樓40層高按常理同外觀應該放20樓,不過現實係大部份都放15樓,因條例寫明最高一層離隔火層唔可以超過25層,所以隔火層會放有咁低得咁低,即係15樓,但求賺到盡!呢啲小秘密唔算好多人知,聽聞新地(016)個凱旋門,室內泳池有諗過起喺大窿上面,然後玻璃底,喺入面游水,前望維港,下面都係維港!」
「正呀喂,但點解最尾冇咗?」
「一來結構上難做,二來怕啲人畏高!」
「高?香港人唔係只會追,幾時有畏過?」

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載