› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

Hea富生活:
渴求上市令生意變質 - 郭釗

創業板殼價升至近3億元,影響香港人做生意的風氣。 資料圖片

凡事有兩面,這是我一向奉信的真理。例如自由行可帶旺香港旅遊業和零售業,但過多就會影響民生,店舖租金上漲,成本轉嫁市民,家陣食個lunch加杯凍飲要四十幾蚊埋單,跟以前未開放自由行比,升近一倍,最慘班後生仔,根據統計處去年中報告顯示,20至25歲的大專畢業生在過去20年,人工冇升過,月入中位數保持在1.1萬元水平,扣埋通漲,衰過以前。
所以外界聲音一直話普羅大眾未必直接受惠於自由行,只是益晒大業主和名店。但同時間香港失業率偏低,約3%左右,屬世界低水平。

同樣道理,股票市場出現大量來自內地的殼股買家,水漲船高,創業板一隻殼由沙士年代幾百萬升到現在近3億元,但卻影響香港人做生意的風氣。
譬如有些生意,係就係有營業額,但冇乜錢賺,可謂食之無味,棄之可惜,唔想求其執咗佢空手而回,很多公司會選擇加把勁於短時間內谷大生意額,盈利多少不是重點,最緊要盤數好睇,再加點噱頭,砌靚個故仔搞上市,成功後賣殼賺一筆標番個尾彩!

香港遲早被中資壟斷

如果借落銀行好多錢,更加要借殼翻身,否則想全身而退都幾難。情況猶如現今很多startups,就算冇賺過一毫子,甚或蝕住做也沒所謂,只要谷大用戶量和流量,配合一個超宏大的願景,一樣有投資者願意投放幾千萬甚至幾個億的資金,當然這不是易事,就算在美國矽谷,約95%的startups亦不獲融資。
同樣在香港搞上市一樣艱難,好似遵理於2015年申請主板上市,翌年5月宣告失敗,根據財務資料,2013至2015年三個財政年度分別賺1,810萬、2,508萬及3,078萬元,但有指四成收入來自同一位「頂級名師」,披露業務危機,所以不是有錢賺就一定過關。

當然,搞上市要揼本,但冇錢唔緊要,因為有大把金主等緊你,只要你公司有potentials,中間人會跟你說:「你做生意幾時賺到3億吖,上到主板,7億喎!」生意人大部份愛財也愛面,上市公司主席的名銜的確難以抗拒。
即是現在做生意,由幾十萬做到接近一千萬,下一步就諗3億㗎喇,冇中間!那試問還有誰會認真切實做好盤生意?成功上市就袋幾億嘆世界,失敗就自然被淘汰,或被中資公司收買埋。幾十年後,香港就會變成全中資集團壟斷的商業世界。

郭釗
http://www.fb.com/heaology.edu
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載