› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

一路一帶:
中聯辦掃港樓之謎 - 斯郎

中聯辦

香港人置業困難不用多講,當荃灣一房單位要賣過千萬時,其實仲未夠荒謬,大陸官同你搶樓先更O嘴。有中聯辦員工以首置客身份掃入港人港樓兩個單位,你先發覺,原來港人港樓係咁嘅玩法。
港人港樓首要條件,係買家必須係香港居民,拎住香港身份證,呢位中聯辦社會工作部副巡視員桂嵐,用1,451.7萬買入上下兩層單位,被記者追問,霸氣地回答——So What?完美演繹「賺中國的錢,擲香港人的鍋」。有報道話,桂嵐早年透過單程證移民來港,符合國情買樓,無可厚非。
不過有曾在中聯辦工作的朋友A就睇唔過眼,大數桂嵐不是;先講講友人背景,大陸名牌大學畢業,在大陸任職公務員,六年前由北京借調來香港中聯辦工作,一做就做了四年,友人聲稱,來香港中聯辦規矩好嚴格,不會享有居留權,即係做夠7年,都冇得成為香港人,就算同香港人結婚,都唔可以做「香港人」,朋友覺得條件苛刻,但抱住入過中聯辦,返到大陸可以更上一層嘅諗法,堅持咗四年後,終於「衣錦還鄉」,一跳就跳咗三級。

朋友A家庭富裕,靠父幹隨時可以Full Pay在港買樓,但當年中聯辦執正嚟做,唔准低級員工喺香港置業,以免招人話柄。所以一直以來,都係中聯辦自己掃貨,好少見有員工買樓,更不用講好似張曉明、李剛呢啲大人物喺香港入市(佢哋目標都係北京黨委嘅職位)。所以朋友A同以前好多喺中聯辦做過嘅舊同事(冇香港身份證),都感到好激氣,大呻唔公平:「佢拎住中聯辦嘅人工,點買到1,400萬嘅豪宅?」其實朋友A不愁衣食,點解咁想喺香港置業?無非因為兩個字「保險」,大陸人在港買樓,就是買了座不動如山的救生圈。
講起公平咩,香港嘅無殼蝸牛都會諗起《創世紀》男主角許文彪對葉榮添講嘅對白,作為仲未上車嘅筆者,只能苦笑對朋友A講返句公平咩,而且,千萬樓現時喺香港已經不算豪宅了。

斯郎
https://www.facebook.com/oneroadonebelt/
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載