› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

中環在線:內地富豪收購
AC米蘭擬在港上市 - 李華華

AC米蘭擬在港上市,以後球迷想支持心愛球隊有新方法。 資料圖片

上個禮拜人民銀行副行長潘功勝批評,有啲中國資本藉住買海外球會轉移資產,話口未完,一位中國投資者得到美國對沖基金Elliott幫助下,已籌得7.4億歐元(約62億港元)收購意大利足球勁旅AC米蘭,有市場消息話,AC仲諗住喺香港上市㖭。
如果真係成功,香港將有隻重量級足球股,AC球迷唔使再喺電視面前打氣,亦唔一定要去意大利聖西路球場朝聖,只要去買一手股票就得喇。
嗰位收購AC嘅投資者,根據公開資料,係中歐體育投資管理長興有限公司主席李勇鴻,本身背景都有啲撲朔迷離,內地人都唔係好搞得清佢資金來源,但應該係希望藉住AC開拓中國球迷市場。
本身李勇鴻投資過程遇到啲障礙,但經過Elliott泵水2.53億歐元後,令到單刁有機會4月中達成,《金融時報》引述接近交易嘅消息人士話,李勇鴻成功收購後,將會喺未來18個月喺港交所(388)上市。
查實𠵱家的確係買AC嘅好時機,因為呢支傳統勁旅,過去6年喺主要歐洲賽事未試過捧盃,同時令到大股東、前意大利總理貝盧思科尼蝕大錢,咁啱中國資本又搶住買球隊,所以真係一拍即合。今次應該唔會,又臨門一腳又買唔成啩……

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載