› 選擇地區
三藩市
紐約
洛杉磯
其他美國地區
香港 台灣 北美
 
2017年03月31日

中環在線:莎莎老闆唱歌係廁所位? - 李華華

郭少明(左圖)喺公司演唱會台上同老婆隔空耍花槍。

化妝品莎莎(178)老闆郭少明貪靚就係人都知,但原來佢都好鍾意唱歌㗎。前日公司整咗場《莎莎邁向40美麗傳承慈善演唱會》代替搞足30年傳統周年晚宴,郭少明一上台就話自己好想唱番首歌,全場反應都猛話好,點知慘慘豬俾郭太ban咗呀!

引述老婆:咁早啲人未去洗手間

郭生就話「上得呢個台我就同太太講,我要唱番首歌,仲𧅵咗太太成個鐘」,點知太太都話唔准,原因係佢「咁早上到嚟,啲人都未去得洗手間住!」嘩,郭太擺明話郭生唱歌係廁所位,但佢即刻話自己有跟師傅學唱歌,仲唱得唔錯㖭!
其實呢啲都係郭生兩公婆之間耍花槍啦,事關呢場演唱會都係郭太嘅主意。郭生話「太太加入保良局11年,仲係主席,但仲有唔夠三日就卸任」,知道郭太想用保良局主席身份為保良局出最後一分力,所以郭生就搞咗場演唱會啦。據知,今次全體入場莎莎員工都要畀少少門票錢㗎,上下一齊做善事,仲順手幫保良局籌咗200萬㖭。
咁聽唔到郭生唱歌唔緊要,皆因個演唱會好多明星㗎,好似莎莎旗下品牌Suisse Programme亞太區代言人周慧敏、李克勤、草蜢,仲有靚聲王陳潔儀同許廷鏗等等歌手撐場㖭!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載