› 選擇地區
三藩市
紐約
洛杉磯
其他美國地區
香港 台灣 北美
 
2017年04月06日

Hea富生活:
從林鄭當選看樓市 - 郭釗

回歸20年來幾個特首上場,每個政綱都是清一色打擊樓市,美其名令無殼蝸牛更容易上車,講呢啲當然容易討好升斗市民。
但口號歸口號,事實上除老董之外沒有一個成功,反之每一屆都差不多年年破頂,以現屆為例,特首梁振英雖然多次加辣圖為樓市降溫,但上任4年半來樓價勁升52%,升勢更似無止境,連粉嶺上車盤家陣都要差不多萬二蚊呎,仲成世界?奈何,偏偏只有令樓價暴跌的老董成了罪人,任內腳痛下台。
究竟中共想香港樓升定跌?答案其實一字咁淺。為何搞出佔中咁大單嘢,梁振英都不用落台?正因為樓價冇跌。
香港人最實際,邊個話事都好,最緊要唔好搞到經濟唔好。所謂「唔好搞亂香港」,背後意思其實是「唔好搞冧樓市」,當然有民主又經濟好就最完美啦!但兩害相權取其輕,大部份人心嗰句,還是層樓緊要,很多人成世的血汗,就在其中,冇計。

覓地遇阻力 樓價難跌

北方的「投資客」不乏權貴,唔通又想樓市跌咩?現在大陸全方位限制走資,即是代表之前走資走到過晒火位啦,走去邊?咪就係香港,以及英美加澳紐等物業市場囉,泊錢梗係買磚頭穩陣啦!當然現在香港多了一班後生仔和之前落錯車的人恨不得樓市跌5成,唉!香港人,現實啲好唔好?夠有7成人想鬍鬚當選啦,但等緊上台嗰個冇鬚㗎,誰話事才是最實際!
當然辣招可能繼續出,與中國很多大城市一樣,他們不希望樓市跌,只希望不要升得太急太快,平平穩穩一年升十零廿個巴仙,財富效應令市民願意消費,經濟好時,條數又好睇,何樂而不為。而且林鄭上場,施政阻力應該不比梁振英小,攞地起樓一點也不容易,政客既要求不遷不拆,又催促政府加快興建公屋,咁神奇都有人信喎,少人住的地方動不得,莫非動多人住的地方會比較簡單嗎?拆樓時,居民搬去哪兒?就算有地方,他們又願意搬嗎?繼續賣地,只會被中資發展商天價投埋起納米樓。
李嘉誠先生在業績發佈會都話「兩年內睇唔到樓市會跌」,我覺得應該是五年內,除非中國政治不隱,但可能性似乎越來越低。香港向上流的機會越來越少,貧富懸殊勢將加劇,仲有,買外地樓的苦主,將會在未來五年激增。

郭釗
http://www.fb.com/heaology.edu
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載