› 選擇地區
三藩市
紐約
洛杉磯
其他美國地區
香港 台灣 北美
 
2017年04月12日

財經評論:
尋下一個雄安新區

炒大陸股應先了解中國地理。 資料圖片

Buy the rumor sell the fact,捕風捉影係好多炒股人的食糊方法,好似4月頭內地公佈要建雄安新區,冠上了習大大之名,令到市場一陣忙亂炒作雄安概念股。其實同時間,內地亦公佈了設立七個自貿試驗區,分別係遼寧、浙江、河南、湖北、四川、陝西、重慶。數完一輪即係點?係咪派number?非也,小記只係想勸大家睇睇中國地圖,事關去旅行做足準備,炒大陸股當然都要有張地圖傍身。
大陸股有樣好,最喜歡將地名放喺身,好似北京乜乜、天津乜乜,出一個概念就炒一轉。今次雄安有少少唔同,因為真係太罨耷,名不經傳到大家都要睇吓地圖先知喺邊。呢個時間中國地圖就派上用場啦,雄安好聽叫做同京、津成三角,但睇落相距100公里,發展十劃未有一撇,但概念呢樣嘢好似「殼股」咁,睇吓邊個做莊,隻股越無內容越吸引,家陣雄安擺習大大上枱喎,路過唔買都睇吓啩?

轆吓微博、微信,幾多自稱分析師、基金經理的人,已經左猜右度有乜好炒,大媽、北水從來不理性的,炒水泥、建材呢啲仲叫看似合理,但內房股呢?實實在在到底有乜股喺雄安有田又有地?頂多就係恒大地產(3333)係河北省有土儲,融創(1918)發展得比較近咁。
但有乜所謂,近期數據幾好,限購限貸調整都需時反映,又炒一轉先啦,咁又六、七個巴仙咁上。近年中資股佔了成個pool一半以上,內地消息永遠夠juicy,千年大計,萬億投資。最後內地朋友教嘅,一線城市連廣州勉強有四個,全部沿海,不妨攞支紅筆由此四城市作起點,往內陸打個三角,可能隨時有下一個雄安。

記者:方楚茵

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載