蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月18日

大棋局:朝鮮短期難開戰 - Mr. Tregunter

8,393
朝鮮局勢緊張,但從戰爭角度分析,短期開戰機會不大。 資料圖片

一個邏輯問題:美國當初點解要喺南韓佈署薩德反導系統?枱面上嘅理由係朝鮮發展核武威脅鄰近地區。倘若朝鮮政權不存在,佈署薩德反導系統嘅理由亦不存在。將軍火看作一門生意去睇,若薩德反導系統要賣埋畀日本同台灣,金正恩就需要存在。
以戰爭角度視之,南韓薩德反導系統估計要7至9月先完成部署。美國駐南韓兵力只有29,086人,就算調動駐沖繩嘅美國海軍陸戰隊第三遠征軍(III Marine Expeditionary Force)亦需時間。除非金正恩頂唔順發爛渣,否則未準備好就打不太可能。反而此段期間瀰漫髮引千鈞之勢,中國已唔好意思再搞任何反薩德反韓動作。
不要忘記,今個月下旬美日安保磋商委員會將於美國舉行,預計日本外相岸田文雄、防衛相稻田朋美將會同美國國務卿Rex Tillerson、國防部長James Mattis會面。外媒消息早已指日本到時會重點提出擴大自衛隊防禦能力,尤其有意集中資源用落導彈防禦系統上,那朝鮮緊張局勢來得正是時候。

薩德名為反導系統,有兩大功能。第一,導彈攔截;第二,軍事偵測。薩德反導系統配置嘅配X波段AN/TPY-2火控雷達被稱為千里眼,可以探測上升中未出大氣層嘅中程彈道導彈,最大探測距離約1200公里。一旦南韓、日本都部署好薩德反導系統,中國沿岸城市包括上海、福建等地嘅軍事動態都會被監控,所以中國對南韓佈署薩德非常緊張。
相信中國曾有意促成南北韓以某種形式統一,可能聯邦制,可能東西德模式,唔知道。藉此反轉東北亞局面,中韓同盟實力凌駕日本、台灣等美國盟友。金正男被暗殺係一個轉捩點,意味中國這一着此路不通。如此朝鮮緊張局面稍後就算緩和,都會定期再炒起,直到日本都佈署好薩德反導系統。軍火、石油都係國家級先能做嘅大茶飯,下一步會輪到石油。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載