› 選擇地區
三藩市
紐約
洛杉磯
其他美國地區
香港 台灣 北美
 
2017年05月09日

大棋局:
大兼併時代再來臨 - Mr. Tregunter

中國步入大兼併時代,海航集團是其中一家積極衝出去的企業。  互聯網圖片

現在是中國的大兼併時代。海航集團成為德銀第一大股東、高價投香港啟德地皮、買入嘉能可油儲業務一半股權;安邦保險買起曼哈頓華爾道夫酒店、入主紐約美林金融中心大廈、收購韓國東洋人壽;連製造汽車嘅吉利集團亦進軍金融業,有望成為丹麥盛寶銀行第一大股東。近年中國投資海外資產幾乎可以用奪門而出形容,好似只要能衝出去就贏,話之你賣幾錢。上一次出現如此景象,已經係三十年前。
鏡頭回到八十年代嘅日本,當時日本正值地產超級狂潮,東京23個區地價夠買起全個美國,係魚子醬撈烏冬嘅時代。日本人有錢到一個地步,三菱買起紐約洛克菲勒中心一半、Sony買起荷李活哥倫比亞電影公司、Panasonic買起美國環球影業。美國人漸漸相信哈佛大學教授傅高義七十年代末已提出的觀點:日本第一。

但當日本土地價格不滅神話爆破後,遺留下來的係供樓供三代嘅爛債。所謂供樓供三代,係當時日本銀行睇好樓市,批出一百年期按揭,結果日本銀行積存大量爛債,日本公司當初高價買入嘅海外資產有相當部份要斬倉賣番出去。不過,三十年後嘅今日,日本權貴持有嘅海外資產仍然世界第一。截至2015年末,日本持有海外淨資產339兆2,630億日圓。自1991年以來,呢樣嘢日本未試過排第二。
用最簡單講法,資產在外、負債在內就係淘空,尤其超級大戶係海外資產債權人,平民散戶係國內負債人,決定咗日本經濟迷失三十年。歷史正在輪迴,還是今次真係唔同?適逢中國處於貨幣改革時期,過去人民幣發行基礎係美元,將來唔想以美元作發行基礎。但當人民幣背後唔係美元時,人哋重信唔信人民幣,呢個人哋係包括自己人。大兼併時代嘅出現,係如日方中,還是由盛轉衰?

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載