› 選擇地區
三藩市
紐約
洛杉磯
其他美國地區
香港 台灣 北美
 
2017年05月18日

一路一帶:譚仔三哥悶聲發大財 - 斯郎

譚仔賣盤10億,譚仔三哥肯定最開心。 資料圖片

譚仔賣盤10億,除了五弟譚澤均之外,譚仔三哥話事人譚澤群應該最開心,皆因估值低、回報率高的譚仔都已經賣10億,分店數目更多的譚仔三哥,絕對有能力自己做IPO上市,爭取更高的估值,取得更大回報。三哥今次可以同五弟講聲多謝,分分鐘兩兄弟可以「破冰」!
譚仔宣佈賣盤嚟到第三日,坊間有讚有彈,好多人都質疑譚仔到底值唔值10億。以專賣米線的舖頭來睇,聽落好似好誇張,但以香港資本市場嚟計數,譚仔其實一啲都唔貴,仲好抵!搵返香港3間同樣開餐廳的上市公司嚟比較,大家樂(341)、大快活(052)同埋翠華(1314)嘅賺錢能力,通通都唔及譚仔。

譚仔經營41間分店,莫講話同大家樂的288間分店(包括一粥麵及泛亞飲食)比較,同大快活的138間分店(10間在內地)以及翠華的63間分店(26間內地3間澳門)相比,譚仔的規模效益理應最低,大家樂同大快活經營多年,其成本及規模應該最大化,最利潤化。
不過如果計算Margin,譚仔去年高達13.96%,完全撼贏梗有一間喺咗近的大家樂,後者只得5.96%。大快活已經好叻仔,長期打贏同宗的大家樂,但都只係區區的8.26%,雙位數字都冇。近年經營不善的翠華,Margin更只得4.53%,認真失禮。譚仔每碗米線只係賣30元至50元(超大碗過橋米線),但每間分店每年平均賺235萬,單價高出超過五成嘅翠華,每間分店只係賺67萬元,講咗咩,大家可以參透吓。
計賺錢空間,譚仔完勝,咁計算吓丸龜製麵究竟有冇買貴貨,可以睇吓市盈率(PE),大家樂PE係29.1倍最貴,其次係翠華的24倍,大快活就21倍,而譚仔呢?只係得10倍,數字真係唔會呃你。就算大家樂股價處於高位,打個三折,PE仍然較高。搵埋內地經營吉野家的合興(047)嚟比較,其PE都有20倍,飲食股PE長期處於十幾至二十水平,譚仔仲有好多升值潛力。

不過今次賣盤成功,最開心嘅唔係五弟譚澤均,而係有忌廉哥做代言人嘅譚仔三哥譚澤群,「譚仔三哥」分店高達53間,比「譚仔雲南米線」多12間,去年接受訪問時,三哥營業額已經有7億,同譚仔相若,譚仔已經價值10億,三哥自己做IPO,甚至借殼上市,PE肯肯定可以高過譚仔。三哥可以同五弟講聲:「阿哩吉多。」

斯郎
https://www.facebook.com/oneroadonebelt/
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載