› 選擇地區
三藩市
紐約
洛杉磯
其他美國地區
香港 台灣 北美
 
2017年05月23日

金手指:死不轉軚睇好彩星 - 孫柏文

百獸王喺美國多間大玩具零售商上一隻賣一隻。 互聯網圖片

前周末彩星玩具(869)出第一季業績盈警,上周二孫柏文答應大家畀一周時間我去摷料。得出結論,係我今日對彩星玩具,特別係股價更有信心,因低位已見。
點解?首先,佢出盈警嘅原因,係舊年五月,佢哋當時最依賴嘅忍者龜玩具,有戲喺花旗國上。之後忍者龜玩具食滯咗,當然影響業績。佢哋舊年全年賺一億,當中七千幾萬係第一季,今年相比下出盈警絕對唔驚奇。如果市場冇預期,呢間每股有八毫現金嘅公司,都唔會由舊年同期嘅兩蚊跌到落年尾嘅1.15元。
之後,可能我提醒話彩星玩具除忍者龜外,仲有百獸王Voltron來緊,大家就跟公司啲回購慢慢掃上。其實喺我今年初叫大家「不問價追彩星玩具」後,有人問我:「其實佢舊年頭半咁勁,今年頭半應該發盈警。跌落來嗰吓,咪就係瞓身之時?」當時我答話,百獸王出一隻賣一隻兼出現炒價。冇買定隻股,佢又唔使出盈警,一支箭咁上,咪永遠冇得入?

問題係,佢真係出咗盈警,係咪百獸王冇料到?當然唔係。到五月,百獸王都係喺美國四大玩具零售商Walmart、ToysRUs、Target同Amazon上一隻賣一隻。最大嘅問題,就係我明查暗訪下,知道原來管理層嚴重低估第一季需求。睇美國網上炒玩具情報站,彩星喺呢幾個月出貨量開始越升越有,而雖賣斷市繼續,起碼有貨出,不過追出貨追到氣咳。
即係第一季嘅盈利,一定係今年嘅低位,而現股價仲係反應盈利冇得升。到中期業績出,發覺第二季盈利已大幅上升,到時你要追,就真係要不問價先追到。可憐。亦解釋點解盈警後公司回購,管理層亦為自己戶口買。我最後要鬧管理層,點解唔信我話百獸王將會好勁?咁保守,要睇到需求先追到氣都咳?但呢期high tech揩嘢、low tech撈嘢,仲唔不問價追彩星玩具?

孫柏文
獨立股評人
http://www.fb.com/shuen
本欄逢周二刊出

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載