› 選擇地區
三藩市
紐約
洛杉磯
其他美國地區
香港 台灣 北美
 
2017年06月09日

知己知彼:
海之戀第二期叫「愛炫美」,誠哥知嗎? - 風吹知

長實新樓盤命名嘅創造力量同幻想,真係會嚇你一跳。  資料圖片

長實(1113)荃灣新盤「海之戀」第一期火速沽清,趁個市仲熱烘烘,發展商宣佈命名為「愛炫美」的第二期計劃月內開賣。長實嘅創造力量同幻想,真係會嚇你一跳。「愛炫美」呢個名旋即引起網民熱論,負評如潮,更有網民幫長實二次創作咗唔少惡搞新名。筆者想同大家探討一下,香港樓盤命名原則,以及樓盤命名新趨勢。
不過開始之前,首先想問長實,「你改個咁嘅名,誠哥知唔知?」要知道李嘉誠非常重視中文,上年曾開出年薪過百萬的優厚待遇招聘「中文主任」,希望請一位具有二十年或以上中文文書工作經驗,精通中國語文、古文等歷史文化的人擔任文膽。不時會在記者會上引經據典、拋書包的李嘉誠,佢嘅中文水平亦曾獲前文膽讚美,「絕對達到中學老師水準,甚至更好。」今次長實改個咁嘅名,係想創新風格、一時失手定純粹玩嘢?

「海之戀」已經被嘲神炒「花之戀」壽司,「愛炫美」MK程度更上一層樓。「愛炫美」雖然想食「愛完美」個音,但字眼意思上變咗「愛show off」,作為一個樓盤名,帶貶意,可以話唔合格。佢嘅出現,簡直就係拋磚引玉。有人話,「愛炫美得,咁愛回家都得啦,仲入屋㖭。」其他惡搞名亦極具創意,包括「愛不炫」、「愛曬命」、「愛炫富」、「愛完未」、「愛之戀」、「求戀期」等等。唔通呢啲就係未來樓盤命名新趨勢?
80、90年代,香港私人住宅樓盤名興同乜乜「花園」、「山莊」、「園」、「居」、「軒」、「苑」、「城」等等,代表有美景花園、沙田第一城、嘉湖山莊等。其後,樓盤名開始走出呢個階段,進入帝王式稱號,要一聽就感覺到奢華、浮誇、豪邁,最好帶點皇家的味道,代表有「帝峰‧皇殿」、「君臨天下」、「天璽」、「御皇峰」、「擎天半島」等。而近年嘅樓盤名開始崇洋,越來越多發展商鍾意只用英文為名,代表有「Grand Yoho」、「Park Yoho」、「Savannah」等。而2016至2017年最流行用的字是「滙」或「匯」,有「帝滙豪庭」、「全城滙」、「海柏匯」、「海翩滙」、「匯璽」、「嘉匯」。
待續。

風吹知
http://www.fb.com/windknows/
本欄逢周五刊出

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載