› 選擇地區
三藩市
紐約
洛杉磯
其他美國地區
香港 台灣 北美
 
2017年06月28日

收市閒情:
香港最大鑊的問題 - 千頌C

超人用人以至做生意,從來眼光獨到。  資料圖片

李嘉誠噚日去汕大出席畢業禮,新聞稿發相,見到超人帶住小小超李澤楷,四圍行逛,一齊吹吓水,樂也融融咁款。喂!超人有啟示!
大家都知,李澤鉅嘅作風係同你計到盡,賺錢,佢就叻!所以超人將長和系交棒畀小超,「Victor會頂替我(長和系)的位置,我好放心。」好啦,講到教育,一般唔係一門賺錢生意,好多時更加要蝕錢。至於講到「肯使錢」呢方面,小小超李澤楷明顯更加擅長。大家都知,超人一向重視教育,所以相信汕大校董會名譽主席呢個位,應該好快會落入小小超手上。
超人用人、以至做生意,眼光從來獨到。單講十年前,你同我仲討論緊「你係咪同台先?同台先可以免費Send SMS」時,佢已經投資Facebook,之後當然金蛋隻隻出、Spotify、Airbnb、甚至係DeepMind……。Deepmind?咩來?食得㗎?唔好笑,應該好多人唔知。呢兩日Facebook有人出Post,就話有內地客落香港旅行,去食嘢冇Cash,伙計即時就話,「你仲唔係食霸王餐」!冇錯,當你笑人哋冇錢開飯,人哋笑你食飯要用錢,「我們內地現在都不用現金!」

冇計,小店推「一番賞」呢,你又話涉「非法獎券」;Uber又被所謂「創新及科技局」狙擊;連政府嘅美食車,都係制肘重重生意難做。
超人喺汕大演辭入面講,「因循的併發症是不思不想和無感無知,在人工智能世代中肯定過不了關。」或者超人言者無心,但我睇到嘅係,正正係香港𠵱家最大鑊嘅問題係,你對住一班仲用緊Internet Explorer嘅人,同佢講咩係I.T、咩係A.I。
「我明年90歲啦,一生志在千里,也知似水流年」,同大部份人講「似水流年」,第一時間諗嘅,多數唔係《牡丹亭》(自己Google係咩),而係會唱出嚟:「不可以留住昨天」。

千頌C
http://www.fb.com/winbigwok
本欄逢周三刊出

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載