› 選擇地區
三藩市
紐約
洛杉磯
其他美國地區
香港 台灣 北美
 
2017年07月25日

Can Bank:摩笛加持 華晨睇30蚊? - 散子

得到大摩嘅祝福,華晨噚日急升8.5%。 互聯網圖片

噚日大摩又吹起佢支摩笛為華晨(1114)祝福,將公司目標價下一子升至30元,經過噚日一輪急升嘅華晨,升完都係得18.2元,今次大摩真係幾樂觀,目標價距離上周五收市(未升之前)有78%潛在升幅,原因係預期華晨寶馬銷售將會有唔錯嘅升幅。
唔少人會響一隻股份急升之際追吓同類股份,睇吓會唔會有得炒吓,升唔足,跟升少少都有賺。但同類型擁有北京奔馳嘅北汽(1958)今日都幾唔爭氣,人哋埋單都升超過8%,佢就要跌0.4%。

事實上,寶馬響舊年百周年慶之時在中國市場被主要競爭對手Benz追到有氣冇掟唞,雖然寶馬舊年響大陸銷售排名仍保持第二,但與後來居上排名第三的Benz追至銷售差距只有4萬部。相信寶馬亦都因為咁受刺激之下,決定未來三年推出最少28款新車,其中14款響今年推出,所以今日可謂重槌出擊。
雖然寶馬今年推不少新車,但Benz事實上亦都唔執輸,今年會推15款。新車推出,有人買先最重要!寶馬中國市場銷售14.3萬部,按年升12.4%。至於北汽方面,Benz首季在中國銷售已達到14.49萬部,按年增長37.3%。
講咗咁耐,北汽可唔可以當影子股炒?睇返最基本,華晨主要業務係華晨寶馬加少少零部件製造;北汽,除咗北汽奔馳之外,仲有北京品牌及北京現代。除Benz之外,其他兄弟都要生性先得囉。

散子
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載