› 選擇地區
三藩市
紐約
洛杉磯
其他美國地區
香港 台灣 北美
 
2017年07月25日

智取大市:港股供求新規律 - 晉佳

目前等入市嘅投資者力量,相比有貨而想食糊嘅投資者力量更大。 資料圖片

市場上肯參與嘅投資者幾乎一面倒睇好後市,但仍有未參與者一直坐擁資金等緊調整,形成一時三刻好友資金消耗得七七八八、但超買又超買唔晒嘅尷尬情況。恒指小時圖RSI三頂背馳,似乎係反映緊呢種狀況。
回帶至7月初,騰訊(700)因《王者榮耀》被官媒狙擊事件而拖累大市,單日恒指曾急跌逾500點,當時令到本來唔敢買貨嘅投資者,都趁難得嘅調整機會一齊搶貨,於是恒指當時跌穿25500點支持位後,唔夠一星期已收復失地,然後火速炒高破頂。

點解跌完先識破頂?原因係調整出現,一直唔敢追貨嘅投資者先至敢趁機吸納,但因驚恐而喺調整沽貨嘅投資者,見無事發生又會買番,於是調整反而觸發唔同取態嘅投資者一齊蜂擁入市,入市資金相比調整前更多,於是恒指回吐反而加速破頂。聽起上嚟有啲矛盾,但呢種玩法今年一直循環緊,因為等入市嘅投資者力量,相比有貨而想食糊嘅投資者力量更大。
除非有突如其來重大壞消息出現,否則未來一兩個月,重覆番6月至7月嘅劇本,即先橫行、後短暫急插、再之後拗腰掉頭急升破頂嘅機會唔低,直至有一日消耗盡市場資金,即單日成交激增至千幾億或以上、確認見頂為止。目前呢一刻,有可能等緊下一次橫行階段。

晉佳
http://www.fb.com/advanceguy1

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載