› 選擇地區
三藩市
紐約
洛杉磯
其他美國地區
香港 台灣 北美
 
2017年07月26日

收市閒情:龍門任搬又如何 - 千頌C

西九龍設一地兩檢,以租賃方式租予內地,唔知幾錢租呢? 資料圖片

官:「各位鄉親父老、叔伯兄弟,廣深港高鐵即將面世。當今聖上天縱英明,深知香港人秒秒鐘幾百萬上落,特別破例開恩,頒下『一地兩檢』方案,好等百姓省時北上。」
蟻民:「嘩!真係謝主隆恩,吾皇萬歲萬歲萬萬歲。百姓省時,當然好着數,咁話時話啦,咁聖上要檢,都要有地方去檢。聖上之前金口已開,根據基本法乜乜物物,內地官員不可來港執法呢?」

官:「斗膽!竟然質疑聖上!『一地兩檢』此豐高偉業,豈容受其他條文阻撓。奉天承運皇帝詔曰,龍門任我搬飄移『境界』。西九總站內出入境樓層部份地方,以及月台範圍會劃作『內地口岸區』。香港係以租賃方式租畀內地,記住,係租!有你着數呀。」
蟻民:「Well!中國果然毋忘國恥,更以史為例,活學活用,重新復興『租界』呢個概念!想當年《南京條約》、《北京條約》割地賠款,真係諗起都令人痛心疾首。喂!話時話,聖上話『租賃』,正所謂數還數,路還路,租,幾錢租先?」

官:「大膽!你慌聖上會走你數嗎……」
蟻民:「即係咁,割讓,呀唔係,納入『內地口岸區』嘅面積,有成10.5萬平方米,即係113萬平方呎!你商業問題就商業解決,總站個位,喺正西九地王,左邊Grand Austin;右邊係凱旋門。ICC𠵱家Office呎租95蚊,屈指十算,呢度月租成億!如果計個折頭,冇8,000萬都有7,000萬啩……嘩!發達啦!中國走資新出路,香港地牢仲唔變金庫,謝主隆恩!」

官:「且慢,當年英國都係『租借』九龍新界,你翻查史書,《展拓香港界址專條》有提過租金?有交收紀錄?當然沒有。不然,他就不會叫『不平等條約』!哈哈哈!」

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載