› 選擇地區
三藩市
紐約
洛杉磯
其他美國地區
香港 台灣 北美
 
2017年07月26日

Money Walker:傳媒.全霉 - El.

美國研究發現,絕大部份網上廣告收入都流向Google同Facebook,傳媒廣告收入難免遭到攤薄。 互聯網圖片

本地免費報與雜誌停刊、傳媒裁員凍薪等消息接踵而至,政治壓力、市場飽和同閱讀模式轉為網上固然係原因,但更重要嘅係,傳媒現時單單依靠廣告收費支撐嘅營運模式已無法持續。
網上閱讀新聞係大勢所趨,但「網上」與「免費」唔知由幾時開始劃上等號。雖然有唔少本地傳媒堅持對網上版內容收費,但收費卻極低,遠遠無法抵銷營運成本,傳媒依然只能依賴廣告收入,而非訂閱或賣紙收入生存。
問題係網上空間無限大,廣告商要畀錢落廣告幫產品做宣傳,單係網上渠道已數之不盡。傳媒sell廣告時唯有以點擊率高為賣點,問題係當傳媒以點擊率而非內容質素為依歸,「邪惡韓式隱世自助小店足料拉絲流心紫薯海膽抹茶芝士雪糕」、「強姦亂輪血肉橫飛身首異處」呢類重口味新聞,自然於網上充斥並頻頻被推送到閣下手機。

問題更不止於此,美國有研究發現,絕大部份網上廣告收入都係流向Google同Facebook,Google與Facebook向網民提供免費服務,獲取廣告收入係理所當然,但兩大科技巨頭分一杯羹下,本地傳媒廣告收入難免遭到攤薄。
讀者唔願榜水睇新聞、傳媒過份強調點擊率,再加上網上廣告市場競爭激烈,再唔發掘新嘅盈利模式,大概傳媒只能永無止境地經歷停刊、賣盤、外判。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載