蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月01日

股壇猛人原是打機高手
創辦Nova eSport 奪世界冠軍

11,822

【科技透視】
提起電子競技(esports),一般會聯想起一班後生仔圍埋打機的畫面,又怎想到太古廣場內一間上市公司主席的辦公室,竟藏有一位隱世打機高手?Nova eSport創辦人楊俊偉年屆不惑之年,但他不愛旅行、只愛打機,更曾奪得手遊《皇室戰爭》的世界冠軍!
記者:梁偉聰 倪敏慧

外表成熟穩重的楊俊偉「機齡」30多年,自7、8歲就開始打機。「嗰時細個玩㩒㩒嗰啲遊戲,跟住之後就紅白機,之後PlayStation」。直至踏進社會,仍然機不離手,「有時出差啦,開完晒會夜晚喺酒店,我就好自閉嘅,淨係喺酒店房到打機。」

部份遊戲課金幾十萬

但對於「毒」這個形容詞,他顯得相當抗拒,「唔好用毒字,係強烈啲嘅嗜好,又唔傷害人嘅,除咗有陣時我課金比較多啲之外……有啲遊戲我哋可以去到幾十萬。」對一名坐擁3間上市公司的股壇猛人來說,可能只是零錢。
出於對遊戲的熱愛和好勝,楊俊偉投入1,000萬元創立Nova eSport,由一個人打、變成團隊戰,將興趣化為事業。「個人第一好似唔係好夠喉,不如要個團隊第一。」香港玩家對Nova可能有點陌生,但打開《皇室戰爭》就會發現,Nova成員長期佔世界頭三、部落亦是全球第一。「我哋嘅選手攞嘅冠軍,真係多到一版紙都寫唔晒。」
Nova的發展集中於歐美,在港才剛起步。楊解釋,海外電競已形成產業生態圈,能做到自負盈虧而非「燒錢」。現時Nova的戰隊已有固定贊助商,以及整套「粉絲經濟」,包括自家品牌服裝、Youtube及twitch上的直播分成等。人工方面,選手全職底薪約2,000美元(約1.56萬港元),當紅的話加上直播分成和獎金,月入可達十多萬港元。

愛打機可令女士放心

公屋長大的楊俊偉,雖熱愛打機,但沒有荒廢學業,考入港大,後加入投行工作。如當年已有電競業,會否直接全職打機?「當時都唔成熟,我又睇唔通,我就唔會咁做。」楊指,今時今日電競需大量後勤支援,如同球會管理球隊。當投資界都接受之際,便代表有資金支援整個行業,他估計往後五年將為電競增長的高峯期。
作為一個有家室的男人,太太可有微言?楊俊偉承認,「喺屋企梗係閂埋房門或者去廁所打」,有時會被譏諷「借咗聾耳陳隻耳」。但他認為,「你有呢一個咁嘅嗜好,消磨到你一段時間嘅話,我諗啲女士都會好放心。」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載