› 選擇地區
三藩市
紐約
洛杉磯
其他美國地區
香港 台灣 北美
 
2017年08月10日

操盤手札記:加息縮表咪當無料 - 割柑人

市場估計聯儲局9月開始縮表,12月再加息一次。 資料圖片

風險日增!講緊嘅唔止股市,仲有樓市。先講股市,恒指朝早衝上27876,再創兩年新高,之後碌低,但午市拗腰,收27757,只跌97點。近期美元回軟,令熱錢留喺香港;不過,港元更軟,連跌9日。港元疲弱利淡港股,幸而北水流入,影響唔大。
至於樓市,樓價指數CCL升至160.3,創歷史新高;不過,喺樓價上升嘅同時,供樓負擔比率亦升至66.1%,遠比1997年至2016年嘅廿年長期平均水平45%為高;若果利率上升3厘至較正常水平,負擔比率更會飆至86%,呢個情況,兩年後有機會見到!
美國即將公佈7月PPI、CPI數據,對聯儲局收水步伐會有啟示。該局早已講明,加息之餘亦會縮表。該局資產負債表規模為4.5萬億美元,打算初期縮表每月上限100億美元,其後每季加碼,最終每月上限500億美元。根據肯薩斯聯儲銀行嘅研究報告,每縮表6,750億美元,效果等同加息0.25厘。
市場估計9月開始縮表,12月再加息一次,之後兩年每年加息三次。以此推算,兩年後9月,計及加息縮表,實際利率為3.08厘!當美元回復強勢,香港亦要跟隨加息,資產泡沫就有更大壓力。
無論投資邊瓣,都要先計回報。買樓更加要計吓自己負擔能力,兩年後美息3厘以上,香港按息隨時要4厘,一來係風險溢價,二來銀行要賺嘛!近年升幅唔細嘅房地產投資信託基金(REITs)同其他息口敏感股,亦要睇緊啲,加息會影響吸引力。
不過,我向來認為買REITs好過買樓收租,恒生房地產基金指數今年以嚟累升20%,CCL只累升11%。香港11隻REITs中,超人系嘅置富(778)同泓富(808)息率有5.2厘,最低嘅領展(823)都有3.6厘,比起住宅租金回報只得3厘左右為高。置富同泓富二揀一嘅話,我揀泓富,皆因上次美國加息後,其表現跑贏置富。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載