› 選擇地區
三藩市
紐約
洛杉磯
其他美國地區
香港 台灣 北美
 
2017年08月22日

Can Bank:買賣股票遇死機 - 散子

網上交易平台多數有免責聲明,萬一有故障,散戶點算好? 資料圖片

今日又有網上交易平台死機,搞到又有散戶沽唔到貨,有人仲因為咁而贏少同輸多咗十幾格,一來一回,都咪話唔傷!其實網上交易平台死機時不時都有發生,《蘋果》時不時都會收到有讀者報料,但又唔見證監或港交所有咩行動執番正佢,網上交易平台更加係一副賠畀你就人情,唔賠畀你就道理嘅款,原因何在呢?
其中一個原因係好多時,網上交易平台本身已經有免責聲明保障自己,就係去開戶嗰時,你填完一大堆又簽完一大堆嘢之後,個客戶服務員會畀番一大堆紙畀你,嗰堆紙中有幾頁啲字特別細,呢大堆字就係免責聲明。
第二個原因係,理論上,投資者唔一定要使用有問題嘅系統做買賣,做買嘅交易,唔一定要用佢,簡單易明,唔使解釋;至於沽貨,亦都未必一定要搵個平台沽嘅,一來你可以打電話,二來其實你只需證明真係有貨,理論上,係可以搵其他平台沽貨;如果隻股票無得沽空嘅,咁就返去第一種方式,電話落盤囉。
相信唔少人都有試過,如果你有打電話去投訴嘅,又或者有傳媒報道過嘅,交易平台職員有時都會聯絡你,同你傾吓睇吓點樣可以補償吓你,一來希望你唔會轉會;但更加重要嘅係希望可以避過一場關公災難,所以散戶都未至於去到完全無保障嘅。

散子
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載