› 選擇地區
三藩市
紐約
洛杉磯
其他美國地區
香港 台灣 北美
 
2017年08月24日

中環在線:
四阿哥:四個月見得阿媽一次 - 李華華

噚日天鴿襲港,導致唔少原本要開業績會嘅上市公司陣腳大亂。不過瑞房(272)主席、有「上海姑爺」之稱嘅羅康瑞就淡淡定,因公司一早表明風雨不改,相見風雨中。
身為鷹君(041)爭產事件「四阿哥」嘅羅康瑞開記招,大家當然要關心吓近期有報道話佢、三阿哥羅嘉瑞同五細佬羅鷹瑞見過媽媽羅老太(羅杜莉君)一面,仲俾阿媽訓示。

「酒店有四重保安」

問到見面情況,羅康瑞就回帶,話近4個月先見得羅老太一次,仲係「幾經辛苦,酒店有四重保安」、「好彩有最大嘅阿哥羅孔瑞帶我哋去,先見到媽媽」,仲講笑話「我媽媽已經變咗政要,要見佢好困難」。
羅康瑞講過,話同阿媽失聯,希望阿媽打電話嚟鬧佢,咁到底今次有冇俾阿媽鬧?羅康瑞就重申,「完全冇嗰回事,媽媽見到我哋好開心」,仲反問「幾個月先見媽媽一次,仲提呢啲糾紛?」
佢強調,今次只為「睇吓媽媽身體點樣,應該幾好」。不過羅老太一方就回應話,要是低調探媽媽,媽媽任何時間都歡迎,但唔好製造輿論。
雖然爭產事件繼續,但冇影響瑞房運作,羅康瑞繼續栽培愛女羅寶瑜做接班人,呢日交畀佢講商業項目表現,不過阿女幾緊張,窒窒吓,好在誠意搭夠。

李華華

mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載