› 選擇地區
三藩市
紐約
洛杉磯
其他美國地區
香港 台灣 北美
 
2017年08月29日

魚樂無窮:9月撈貨好時機 - 唐牛

當人人都知買騰訊贏梗嘅時候,短線形勢必然逆轉。 資料圖片

港股先甜後苦,朝早成功突破28000大關,上等威風,但在股王騰訊(700)拖累下,指數一度倒跌,埋單亦只得15點升幅,認真慘無人道。最大鑊係成交非常暢旺,傳統智慧話畀我哋聽,呢個係高位派貨典型訊號,我雖在好友軍營,但面對如此肉酸走勢,想唱好都唱唔落口。
「點解騰訊咁樣衰?唔係話業績好好咩?」一句說話,股票市場輸錢嘅人一定多過贏錢嘅人,當街邊阿毛都知買騰訊贏梗嘅時候,短線形勢必然逆轉。恒指本周五收市後換馬,騰訊比重技術上會下調,從呢個角度出發,誰在沽貨答案已寫在牆上。
入正題,點解9月係撈貨好時機?業績期即將完結,恒指升勢坐七望八(月份計),進入9月好消息真空期,調整屬理所當然,再講,美國又吹風有財政懸崖危機,又有縮表啟動時間表,用嚟高位震倉一流,咁多因素擺埋一齊,易跌難升也。
跌市買乜好?當然係強勢大價股,最好係今浪創歷史新高那些,冇蟹貨下回氣再上力度肯定更勁,講到咁白都唔知,快啲重搵本欄推介吧。都係那句,機會係跌出來的,唔怕冇機會撈貨,最怕你唔敢撈。

唐牛
http://www.fb.com/tongcow88
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載