蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月19日
馬上成為壹會員

金手指:一注獨贏BBI - 孫柏文

BBI市盈率十幾倍,開始吸引基金入貨。 互聯網圖片

生化科技,之前同未來增長好快相信大家都信。不過唔好話炒,大家應該睇都唔睇。淨係見到啲產品名一個字十幾個英文字母都即跪,孫柏文近月都求科大專才教導多次先明。
港散戶唔識,唔等於其他人唔識。7月喺深圳上市,話係「生化科技騰訊」嘅華大基因,兩月升12倍。港上市嘅金斯瑞(1548)則被投行里昂選為八隻「倍升股」之一,之後升到70倍市盈率。其實,早排帶起全行股價嘅兒科血癌藥Kymriah出台新聞,收錢模式可將生化科技諗成地產發展,有如起個IFC出來收租。高固定投資後,慢慢收錢。
叫大家一注獨贏嘅BBI生命科技(1035),用地產作比喻,就係賣地基樁柱、挖泥機等。金斯瑞營業額增幅冇BBI咁快,兩成對三成,營業額只多三倍,不過市值就大十倍。點解咁平?
首先,之前BBI市值不足十億,基金經理唔准買。仲有中期盈利只升4%,亦令佢成寶藏嘅原因。佢盈利升少過營業額,係因收購繼而增大銷售團隊及產能嘅成本,撇除的話,盈利增長快過金斯瑞。
我平時見呢啲理由都會唔信,不過從未見過,8億資產,億半「負債」中,1億係因客戶餓到預繳嘅款項!即啲sales死晒,都有三個月生意額喺手!要增大啦吓話?
最後,生化科技毛利好高,因要專門知識同可信先有人幫襯。所以唔係王維基、黎智英等有日起身想做就可做。佢市盈率十幾倍,又已開始吸引基金入,貨乾到喊,大家識做了。

孫柏文
獨立股評人
http://www.fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載