› 選擇地區
三藩市
紐約
洛杉磯
其他美國地區
香港 台灣 北美
 
2017年09月22日

中環在線:小加逼港交所高層30萬買金條 - 李華華

李小加今年7月出席港交所黃金期貨開市儀式已落力sell金。路透社

港交所(388)行政總裁李小加口才了得,出名係top sales,今年力推嘅黃金期貨主打實物交收,噚日佢自爆,逼港交所高層一人買一條金條,盛惠30萬蚊!
噚日佢出席證券及投資學會午宴致辭,提到香港想保持競爭力,必須要發展多種資產級別,例如商品、固定收益等等,唔應該因為過往幾十年都靠股票交易食糊,就故步自封。
剛過去嘅暑假,港交所聯同旗下倫敦金屬交易所(LME),齊齊推出「兩地雙金」黃金期貨,香港版本就首創實物交收,港交所亦因此特別打造一批刻上自家logo嘅金條。李小加爆料,為咗推動實物交收,佢要求高層人人買一條撐場,每條30萬蚊。

「揸上手好好feel好實在」

華華呢個層次,對拎得出30萬買金條,只能流吓口水。小加落足嘴頭,認為金條係「超抵買,係好好嘅紀念品」,佢仲即刻向在場嘉賓推介,呼籲大家埋嚟睇、埋嚟揀,「揸上手,你就知道好好feel、好實在」咁話。
呢批金條係瑞士製造,質素肯定有保證啦。不過聽講登記咗買金嘅港交所高層,仲未收到貨、亦未畀錢,所以未有人知道條金條究竟幾好feel嘞。
今年7月推出嘅人民幣(香港)黃金期貨合約、以及美元黃金期貨合約,投資嘅係含金量不少於99.99%嘅1公斤黃金,要由認可精煉廠標籤同發出序列號㗎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載