蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月09日
馬上成為壹會員

經濟客艙:好想升足一萬年 - Captain Cool

美國若果未來3年只加息1厘,對美股大好友而言,估值仍處於合理水平。 資料圖片

講到「期限」,喺Google大神搜尋一下,竟然彈出了「期限 一萬年」,再按下相關連結,就發現呢段對白:「如果上天可以畀機會再嚟一次,我會同佢講我愛你。如非要喺呢份愛加上一個期限,我希望係一萬年。」
面對股市強勁升市周期,有貨喺手好想升足一萬年。莫講恒指3萬點見,就如股神畢菲特所講,道指100年後升見100萬點。現實當然未必如願,資產升跌周期不會單向而行。但係股神不是隨口嗡,道指作為股市歷史最悠久嘅指數之一,道指回到起步時,成份股只有12隻,首次報價為40.94點。134年後嘅今日,截至上星期五,道指成份股有30隻,收報22773點,即係期間升幅超過兩萬二千點。其實為股市升市設期限,畢菲特話100年後100萬點,道指每年平均升9700幾點可望到價。
提到呢點,至少都係睇好美股長期表現。中長線而言,美股超級牛市歷時8年半,隨美國聯儲局本月開始縮減資產負債表,正式步入收水時代,為超寬鬆措施劃上句號。道指上望二萬三點大關,跟上星五收市價計相差不足1%。如《經濟學人》今期封面故事分析指出,資產價格漲勢持續,興奮時亦有顧慮。美股牛市終結者,不可不提儲局縮表兼加息,金融海嘯後儲局向市場釋出11萬億美元入市購買資產,依家推出逆QE措施,效果係點好快知。另外,基金經理們最近密密吸納伊拉克、烏克蘭同埃及發行嘅eurobond,原因係回報有7厘。其他因素仲有中國債務爆煲及美國北韓動真格開火,同樣左右市場表現。
至於美股係咪好貴,呢條無論升穿萬五點抑或二萬點時候都會有人問嘅問題。其實跟畢菲特睇法也對路,緊留意美國息口去向,若果未來3年儲局只加息1厘,對美股大好友而言,估值仍處於合理水平。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載