› 選擇地區
三藩市
紐約
洛杉磯
其他美國地區
香港 台灣 北美
 
2017年10月09日

笑到最後:追新股心路歷程 - 高明

眾安股價爆升,全城期待目標見紅底。 資料圖片

上星期三,收市前高明先後於電台節目及網上直播奔走相告,叫大家一兩手都買眾安(6060),好過眾安升到100蚊時一股都冇,即日收市前已炒上80蚊,中秋假期後星期五最高見96.1蚊。
高明過去一直對眾安完全冇興趣。刺激到高明四圍叫人買貨,因為升幅再加話題性,再唔買一定會被拋甩,所以打畀經紀叫佢直掃,竟然叫佢直攞仲要排隊,買得咁辛苦,高明就知道今次係恐慌性買入。
事實上,叫人買眾安,並唔係為咗今鋪,講真,推介時76蚊,全城期待目標見紅底,都不過係兩成多。但炒股一定有人水皮過你,最入門級買股票就係抽IPO,眾安一手黨上市揸到𠵱家亦大有人在。試諗吓,眾安股價爆升,假設已見紅底,你班朋友之中炒股最水皮嗰個,有一日問你:我隻眾安沽唔沽好,我上市揸到𠵱家賺咗七成點算?
面對呢條問題,如果你不曾有貨,你點答?更嚴重嘅影響係,你位朋友將會講眾安講一段時間,然後話炒股票好易賺錢。而你一股都冇,到你之後落盤買其他嘢,就會為咗「追番」呢段升幅而影響情緒。
但既然可以高衝眾安,點解唔跟?如果衝贏,都叫跟到;反之輸就一齊輸,冇話邊個勁邊個渣,唔會太影響下一鋪嘅情緒。而且贏最快嗰段比起IPO一手黨,認威時不失霸氣。
至於𠵱家走勢,有貨不論想長揸定短炒,星期一都應該食啲,畢竟𠵱家情況有啲似年初美圖(1357),升得快,最後炒爆嗰刻一定人踩人,到時先走會好趕。全城目標睇紅底,好彩就衝穿升更多,唔好彩就爭少少掂到就炒完。想長揸食少少,有剩啲貨可揸得舒服啲;短炒一定冇可能最高一口價沽,邊升邊食會較合理。
至於未有貨,高明只能話,目標價睇100蚊,其他自己諗。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載