› 選擇地區
三藩市
紐約
洛杉磯
其他美國地區
香港 台灣 北美
 
2017年10月18日

Money Walker:澳洲辣招值得參考 - El.

澳洲推出連串措施遏止外國買家(主要係中國人)於當地置業,成功令澳洲樓價回落。
資料圖片

施政報告出爐,房屋政策一如預期冇驚喜,針對中產嘅首置上車盤更被指劫貧濟富。筆者認同分析所指,林鄭推首置上車盤主要係想挽回喺中產階層嘅民望。坦白講,為保賣地收入及香港經濟,政府絕不可能推倒樓價,所以即使重建置業階梯,資助房屋供應量同白居二名額亦一定相當有限。
關於樓市前景,筆者反而更關心息口問題。聯儲局口風近期明顯轉鷹,今年底加息一次、明年加三次,幾乎係大部份儲局官員嘅睇法。就算打個折當明年只加兩次,推算美國息口明年底亦會升抵兩厘水平。即係話單單做美元定期,回報已經同買港樓收租相若或僅僅略低,投資私樓收租吸引力自然進一步減少。
不過筆者不才,難言樓市會否就此見頂,畢竟投資需求減少同時,移民來港人士數目、內地借買樓走資來港規模等因素,都對樓市需求有重要支持,幾年來睇淡樓市嘅分析一直錯晒,亦係由於上述因素難以預測,兼從無官方數據可供追蹤分析。
其實香港政府如果有心保障本地人置業同租樓,澳洲政府嘅做法絕對值得參考。澳洲推出連串措施遏止外國買家(主要係中國人)於當地置業,除咗大型銀行停止向海外買家提供借貸,取消非澳洲居民房地產交易資本增值稅優惠,仲有相當創新嘅招數,包括半數新屋必須向本地人出售、向丟空房屋嘅海外業主徵收空置稅,結果成功令澳洲樓價回落。既然房屋問題屬今屆政府首要處理事項,香港政府又夠唔夠膽做到澳洲呢一步呢?
El.
fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載