› 選擇地區
三藩市
紐約
洛杉磯
其他美國地區
香港 台灣 北美
 
2017年10月18日

收市閒情:陳帆局長神邏輯 - 千頌C

陳帆嘅「年輕人買車論」,引起好大迴響。 資料圖片

「年輕人買唔到樓,又想自己有個空間,畀軀體同個靈魂出去遊走一下,就去買車。」運房局局長呀可?陳帆呀可?喂!抬起頭,被高樓價包圍下,局長呀,我都想「軀體同靈魂遊走」,因為香港人陷入絕望。
有幾絕望,只要睇吓六合彩帶畀人幾多希望。由細到大,你多少都講過一次「如果我中到六合彩頭獎就好啦。」有幾好?2010年11月前,頭獎獎金保證係500萬元,分分鐘買到三個嘉湖山莊500幾呎單位,今時今日,只係買到1個;就算依家頭獎獎金保證升到800萬,咪買到一個大少少市區有房單位。每買一注六合彩,係買一個致富的希望。但香港被樓市玩死,玩到絕望。由2003年升到2017年,香港後生仔根本係被逼打緊一鋪機,而呢鋪機,係注定俾人屈爆機。
你想買樓,Package劉講過,「忘記旅行,向着標竿直跑」,咁你就買到樓。你好努力儲錢,儲到30萬,支標竿飄移去50萬;你跑到去50萬,佢就飄移到100萬。大佬呀,好哋哋一支竿點解會郁,除非有鬼!係有鬼呀,隻鬼叫死窮鬼!然後林鄭都同你講,「我都買唔起樓呀」,咁你仲講咩?唔買樓,咁買車啦,要「真上車」唔係好貴,幾皮嘢夠,但你睇吓車位?今日睇數據,香港領牌車輛數目,由2006起10年升35%至74.6萬架,當中私家車數目增加45%;但泊車位呢,同期增幅只有9.5%。
睇埋陳局長講咩,「希望增加公共交通效率、方便及舒適度,減少市民買車的意欲,讓未來私家車增長能理性一些,最後才考慮增加首次登記稅。」我上唔到車,去買車,件事已經好反智,然後你同我講,「我知你想買車,但我想你理性,於是我會諗方法打擊你買車嘅意欲。」
咁我明點解車位咁多年會唔夠,就好似當日政府為減少廢物,設計個細口嘅垃圾桶;現時唔想你買車,就唔畀車位你。
上車我卡關,到買車,你又閘住我。他日我「軀體同靈魂遊走」死埋,會唔會難逃卡關命運,連骨灰龕都上唔到。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載