› 選擇地區
三藩市
紐約
洛杉磯
其他美國地區
香港 台灣 北美
 
2017年10月18日

中環在線:鴻福堂賣夏枯草番梘 每嚿$100 - 李華華

夏枯草梘

涼茶係國家非物質文化遺產,但有唔少人唔太喜歡佢苦澀嘅味道,覺得難以入口。鴻福堂(1446)作為少有的「涼茶股」,噚日喺中環文青聚腳點PMQ元創方,搞咗個為期約一個月嘅Pop-up store,出售用涼茶渣所整成嘅番梘,宣揚涼茶文化咁話。
噚日活動仲請咗歌手許廷鏗化身研究博士,佢仲搞爛gag話,自己平日會將涼茶「重組、分拆、再上試(管)」,亦有試過用豬腳薑整番梘,不過因為太油失敗咗,故現時Pop-up store只有4款涼茶番梘賣,包括杏仁露梘、火麻仁梘、夏枯草梘同雞骨草梘,每嚿要成一百蚊㗎,值唔值就見仁見智喇。

涼茶渣循環再用

鴻福堂總經理兼執董司徒永富就話,集團一直想將草本生活化,今次可以用涼茶渣呢一類廚餘循環再用,都算盡吓社會責任。佢提到,下年鴻福堂有意開一、兩間概念店,引入多啲蒸飯、小食,又會有多啲座位畀客人留耐少少,所以如果今次涼茶番梘反應好,會計劃將產品放埋喺門市度賣。
司徒永富話今次活動使費好少錢,雖然PMQ成日被人批評人流少,但佢就認為呢度有「本土、創意、希望」等概念,嚟得都係對生活有追求嘅人,所以完全冇擔心人流少嘅問題。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載