› 選擇地區
三藩市
紐約
洛杉磯
其他美國地區
香港 台灣 北美
 
2017年10月20日

中環在線:長江中心最多人OT叫外賣 - 李華華

UberEATS指香港打工仔OT最愛食麵。資料圖片

人人都OT,唔通人人都想OT咩?香港打工仔出名夠勤力,成日OT到半夜都唔出奇,咁講明係OT又點會得閒落街食吖,要醫肚惟有叫外賣囉。UberEATS噚日就公佈咗個數據,發現喺夜晚8至10點呢個OT時段,中環長江中心係全港最多人叫外賣嘅大廈。
睇番長江中心嘅租戶,除咗「超人」李嘉誠旗下上市公司,仲有證監會、美國銀行、巴克萊銀行、彭博新聞社等等,究竟邊間公司嘅員工要成日OT呢?估唔到超人勤力箒,喺長江中心返工嘅人都成日開OT。至於排第二同第三位嘅,就係港島東中心同環球貿易廣場(ICC),3幢都係甲級寫字樓。
UberEATS仲有個有趣數據,指灣仔區有個打工仔,喺全年星期一至星期五嘅OT時段,一共落咗255張單。嘩,咁咪差唔多晚晚OT?

打工仔最愛叫麵醫肚

咁OT食嘢最緊要乜?當然係快、方便同埋飽喇。所以打工仔OT首選餐點係米線類食品,其次就係越南菜,譬如越南河粉;第三就係泰國菜,好似Pad Thai(泰式炒金邊粉)。即係麵,全部都係麵,貪佢「嫃」一聲食完又可以繼續工作,唔通仲慢慢嘆個full set嘅fine dining咩。
UberEATS仲公佈埋港九新界唔同地區,啲人鍾意叫乜嘢食,普遍都係粉麵類取勝,惟獨是新界區居民最愛食手撕雞同雞髀飯,認真識食。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載