› 選擇地區
三藩市
紐約
洛杉磯
其他美國地區
香港 台灣 北美
 
2017年11月01日

收市閒情:鄭經理都難救渣打 - 千頌C

渣打近期連續出現低級問題,就算鄭經理行出嚟都救唔返客戶信心。
互聯網圖片

銀行,貴為「百業之母」,要搵食,要找數,要錢搵錢,喺得你度開戶,真係講個信字。你又點估到,渣打(2888)堂堂一間咁高級嘅發鈔行,竟然可以短短幾日內,連續出現低級問題!
1)講閱文(772):
「阿姐,你有冇抽閱文呀?」話說我公司清潔阿姐,一向勤力掃地之餘,亦都好勤力掃股。呢隻新股凍資大拿拿5,200幾億耶,佢冇可能放過,點知,佢竟然講,「我冇抽呀!我打去渣打,打極電話都冇人聽。」對於面前呢位勤奮嘅渣打客戶,I really feel sorry for her lor,然後我又唔識死,再問,「咁點算呀,雷蛇(1337)都唔抽呀?」「唔抽啦!都打唔到電話嘅。」
廿一世紀,網上認購IPO,是一件好基本嘅事吧!有咩可能今時今日,仲係只能夠用電話落飛抽IPO?知唔知最搞笑係咩,渣打不提供IPO孖展服務㗎,喂呀!銀行明明係靠借錢搵食嘅,但偏偏唔做借錢生意!全香港有40萬人抽閱文,即每15個成年人,就有1個有抽。至於渣打嘅客戶,成為冇份嗰14個人。
2)講iPhone:
渣打信用卡,好勁㗎,阿「鄭經理」行出嚟,大家都記得你係4蚊1里呀化;你見渣打添食,最近推多張樂少卡,就知信用卡呢條水搵到食喇。渣打公佈嘅,上半年信用卡簽賬額按年有三成增長,仲話希望樂少卡,首年發卡至少十萬張,𠵱家?諗吓好喇。
𠵱家渣打系統故障,搞到大家訂唔到iPhone X。即係咁,訂iPhone係香港一年一度大型DDoS襲擊。俾蘋果Cut單,大家心甘命抵,但𠵱家係幾經辛苦,同F5粒掣惡鬥一輪後,成功去埋信用卡資料,渣打竟然同我講,「Sorry,我其實冇幫你過到數。」
3)翻舊賬:
抽唔到閱文;iPhone X食詐糊,兩單都係阻人搵食。再加埋股票系統Breeze Trade經常發神經死機變Freeze trade(大時代沽唔到貨呢一役,真係歷史不會忘記);ATM提款一次要117秒,挑戰人類耐性極限;都未講網上銀行系統太廢,罪狀單單都擾民兼累人。
話說香港係渣打最大收入來源,咁多罪狀加埋,就算鄭經理行出嚟跪到玻璃穿,都救唔番個信心。至於𠵱家渣打關公最後嘅逃生門,只有一個,就係iPhone X同閱文潛水。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載