› 選擇地區
三藩市
紐約
洛杉磯
其他美國地區
香港 台灣 北美
 
2017年11月03日

中環在線:同瑞銀拜拜 于正人今起休假 - 李華華

今年港股旺場,輪商生意應該唔差,點知喺瑞銀做咗13年嘅亞洲股票衍生產品銷售部董事總經理于正人(Johnny,圖),忽然話今日起離職休假,成個孖屐都O晒嘴,呢件事都幾耐人尋味。
華華噚日打電話畀Johnny,問佢點解無端端離開瑞銀,佢就話想唞吓先,同埋好耐之前已經決定咗,近月已經安排其他同事代表瑞銀評論窩輪走勢。

明年1月正式離職

Johnny指,正確嚟講,今日唔係last day,只係之後佢唔使再返公司,真正嘅last day要去到明年1月,今個月中佢會同老婆去日本旅行,原本每年都係12月去,今年早咗少少箒。
佢強調,過去多年喺瑞銀工作愉快,瑞銀嘅窩輪部門佢有份湊大,而且幾個月前已經交足今年嘅數,仲有介紹新客畀財富管理部門,即係帶到新生意畀其他部門㗎。
Johnny年輕時喺倫敦政治經濟學院(LSE)畢業,之後喺英國做過3年會計師,又做過瑞信金融產品部6年,2004年加入瑞銀至今,絕大部份時間係sell輪,炒友應該都好熟悉。
嚟緊佢話唔一定做番金融相關公司,可以做其他嘢,「都已經做得咁好喇」。查實Johnny要留喺金融界一定大把好路數,例如加入佢好友李民斌嘅東亞銀行(023),一樣可以大展拳腳,當年于正人結婚,李民斌係兄弟團成員之一呀。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載