› 選擇地區
三藩市
紐約
洛杉磯
其他美國地區
香港 台灣 北美
 
2017年11月09日

中環在線:呂志和不言休:你養我呀? - 李華華

呂志和(中)噚日捐1.2億元人民幣予北京大學生命科學學院成立基金。

嘉華國際(173)主席呂志和今年88歲,每次現身都俾人問佢幾時退休,難得佢唔怕煩,次次都畀個過癮答案。好似噚日佢出席一個捐款活動,有人又問佢幾時退休,佢就笑咪咪咁反問對方:「退休你養我呀?」認真識講笑。
呂志和一直都冇話退休,佢講到明退休唔好,千祈唔好退休咁話,佢仲醒華華多一句話:「叫爸爸媽媽唔好退休呀,打番幾圈麻雀仲好!」都啱嘅,人要有嘢做先至可以keep住有活力。

捐1.2億予北大 叫傳媒讀好啲書

唔退休,咁政府計劃用嚟做首置上車盤嘅安達臣道石礦場地皮又點睇先?佢表明公司有興趣投標,出價會相當進取,不過成功與否就真係睇運,「睇個天畀唔畀機會,唔畀咪笑吓或者流吓眼淚囉」。
不過佢就唔肯多講樓價,話「唔講喇,越講就越升!」佢只係叫年輕人唔好反對填海,畀政府搵多啲地,多啲供應先可以解決樓價問題。
講番噚日活動,呂志和捐出1.2億元人仔畀北京大學生命科學學院,成立「呂志和生命科學學院基金」。講到興起,呂志和叫台下傳媒「畀啲心機,讀好啲書」,轉頭補多句「不過你哋都夠好」,都話呂志和好有幽默感喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載