› 選擇地區
三藩市
紐約
洛杉磯
其他美國地區
香港 台灣 北美
 
2017年11月13日

中環在線:李達志升呢副總裁
即日冧賓架 - 李華華

剛升職的金管局副總裁李達志就算要趕飛機,都專程去財資市場公會周年晚宴。

一年一度「炒房」高手匯聚一堂嘅財資市場公會(TMA)周年晚宴,上周五晚(10日)又喺灣仔君悅開席。舊年大會請咗心穎BB做司儀,俘虜唔少Banker嘅心,今年冇咗女神現身,不過都有《超級巨聲》一炮而紅嘅「小巨肺」林欣彤做嘉賓,唱得有聲有色。
啱啱同日公佈、獲晉升為金管局副總裁嘅李達志(Howard),雖然趕搭夜機去歐洲公幹,但都畀面出席撐場,仲同TMA一班執委上台大合照。一眾賓架當然趁機恭賀Howard升職,等佢請食飯云云,唔知係咪隔空傳音、聽者有份?

冇學前任上台獻唱

講番小巨肺林欣彤,當晚台上唱咗3首歌,包括林憶蓮嘅《至少還有你》,仲有已故天后雲妮侯斯頓(Whitney Houston)嘅首本名曲《Greatest Love of All》,真係少啲氣都唱到休克。
有炒房高手話,以往周年晚宴有才華橫溢嘅金管局前副總裁彭醒棠(Peter)壓陣,仲有佢自己隊Band撐起,天王天后駕到都未驚過,一於台上照jam照唱,但舊年Peter已退休,家下遇着小巨肺,大家都係聽吓歌、影吓相開心算嘞,今年都冇乜賓架上台獻唱的環節。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載