› 選擇地區
三藩市
紐約
洛杉磯
其他美國地區
香港 台灣 北美
 
2017年11月13日

笑到最後:10條狂牛必守戒律 - 高明

人生總有下個牛市。資料圖片

慢牛會否轉快牛?高明相信會,特別係升穿30000點,重上10年前水平,向上憧憬無限。眼見市場仍然審慎樂觀,每跌幾百點已經有人擔心股災,證明狂牛未到,所以寫定10條戒律,希望殺得性起時冷靜頭腦。
一、冇份贏慘過輸。大牛市人人魚翅撈飯,做實業值得表揚,但牛市持續下去點都會心理不平衡,到恒指見更高位例如50000點先按捺不住衝入場,接火棒機會更濃,趁未到30000點、狂牛未到,求其買兩手盈富基金(2800)參與吓啦。
二、人生沒有幾多個贏錢嘅牛市。今次慢牛「人生沒有幾多個牛市」成為銷售口號,但決定牛市定熊市,取決於你贏定輸。擔心牛市冇份贏而冒進,可能得不償失,冇把握贏可以上番「一」買盈富基金。
三、買升嗰隻。如果覺得盈富基金太慢,今次牛市特點,就係升嗰隻升得更勁,可以選擇騰訊(700)同平保(2318),孖寶好處係,一隻唞另一隻行,輪流升揸得更舒服。
四、唔好怕揸正股。出於快嘅考慮,好多人都會選擇買衍生工具,但今次牛市每月大跌一次殺死貼價好友,自問唔夠強就買番正股。
五、細注駕馭衍生工具。衍生工具會全輸,唔博倍升就冇值博率。以高明為例10月底建議買恒指28000點最貼價牛證,現時已倍升,持貨至今因為買得細。
六、最保本嘅方法係早段贏得多。大牛市冇人可以估頂,但散水一刻一定知,高位回落賬面一定有損失,但早段贏得多足以彌補散水損失。所以關鍵係早段要買強勢股,退而求其次追落後,高位要識落車。
七、幾時離場?牛市最高𥧌時,政府會有動作,馬雲會推螞蟻金服上市;到政府「暴力救市」,亦係最後逃生機會。
八、熊市反彈死最多人。牛市完結多數人贏住走,但死得最多人係熊市反彈,心魔必然會同你講:高位回落5000點,抵買!
九、狂牛彈出彈入。最瘋狂時一定冇紀律亂買,惟有硬性設逃生位,跌穿彈出,重上彈入,蝕使費同差價,但至少唔使一舖清袋。
十、人生總有下個牛市。贏一蚊都係贏,好過輸住走。記住,畢菲特99%嘅財富都係50歲後賺番嚟。有啲嘢,急唔嚟。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載