› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

智取大市:升勢急過預期 跟住點玩? - 晉佳

噚日恒指突破3萬點後有沽壓,未來整固過程難料,但預計可以再破頂。李家皓攝

本欄上星期日(11月13日)即時專欄講到,港股可能趁11月下旬至12月呢段蜜月期內,炒風延續並進入白熱化階段,當炒股份目標年尾前有一至兩成回報。過咗個幾星期,恒指升咗接近1,000點,呢一刻再睇吓現況係咪一如預期。
騰訊(700)、平保(2318)至今升一成左右,最強嘅領袖股已搶先達到原先目標嘅一半回報,升勢比預期為急,兩隻股高位成交超大,但股價未見急chok,暫時睇只係整固一吓,未似見頂。由於兩股遠比預期更早炒到曉飛,成交已變天文數字,的確難以想像去到年尾會變咗乜嘢樣。平保千億淡倉,挾淡倉起上嚟,要連番出現周二單日升近一成嘅情況,似乎唔出奇,加上港股1,500億成交顯示亢奮狀態已成,估計平保要升至「紅底」將變成簡單任務。
整體市況方面,踏入11月下旬應靜不靜,成交連續兩日升到1,500億樓上,氣氛升溫程度,遠比想像中來得快、來得強。而噚日恒指突破3萬點後有沽壓,但恒指由高位回落唔夠200點,已經算有承接力,未來整固過程難料,但預計可以再破頂,對沖基金年結過後,趁市旺、冇風浪應該未肯收手。
瑞聲(2018)自從季績前後由140蚊衝到180蚊,然後靜咗幾日冇跟大市急升,但股價冇明顯回吐,仍然喺高位附近。瑞聲手機鏡頭熱賣,第四季月產能1,000萬件、明年2,000萬件光學產品應該暢銷賣得去,加上高端玻塑混合鏡頭明年下半年推出,先係單挑大立光嘅重頭戲。瑞聲收入、盈利隨住光學產品基數零水平起步爆升,重估潮未完,股價遲早翻炒。

晉佳
https://www.facebook.com/advanceguy1/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載