› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

中環在線:富昌老闆撈埋珠寶界 網攻內地客 - 李華華

郭俊偉(右)開珠寶店,阿仔郭曉澤應該都要幫手喇。

近期金銀珠寶市道翻生,做開證券嘅富昌金融主席郭俊偉都忍唔住手想玩埋一份,話要進軍鑽石珠寶生意,開番間「富昌珠寶」。佢似乎有晒大計,話第一步先喺尖沙嘴開實體店,希望證券行客戶同珠寶店客戶可以做到cross-sell。不過,佢大呻搵舖難,租金仲係好貴咁話。

直接同星洲交易所攞貨

佢透露,公司向新加坡鑽石交易所攞貨,可以慳番中間人費用,預計產品可以平市價約三成,又會開網站攻內地客,話內地人都慣晒用微信支付嚟網購。
佢講講吓提到大數據,話咪以為齋開店咁簡單,到時會實現「共享客戶」。一句到尾,即係介紹現有證券客戶買珠寶,同時又介紹買珠寶嘅客戶去證券行開戶。佢講笑話,大家結婚記住搵佢,佢頂多原價出售,一蚊都唔賺,真係多謝晒。
同場仲有主席「細仔」郭曉澤(Danny),佢自我介紹話舊年加入富昌,家陣係主席助理,同其他員工一樣朝九晚七。
本身喺英國讀犯罪學嘅Danny話本來想做社工,應爸爸邀請加入公司試一試,目前乜都做,文書工作居多。所謂虎父無犬子,唔知Danny又有冇投資呢?佢就怕醜笑一笑,話都係投資公用股收息為主,好保守喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載